Москва ақалақь аҿы имҩаԥысит  ахәыҷқәа рзы еиҿкааз ашықәсҿыцазтәи акарнавал. Аныҳәа еиҿыркааит Урыстәылатәи Афедерациаҟны иҟоу Аԥсны Аҳәынҭқарра Ацҳаражәҳәарҭеи Москватәи аԥсуа диаспореи.

Урыстәылатәи Афедерациаҟны иҟоу Аԥсны Аҳәынҭқарра азинмч змоу Ацҳаражәҳәаҩ ҷыда Игор Ахба ахәыҷқәеи урҭ рҭаацәеи ирыдиныҳәалеит иааиуа аныҳәа, ирзеиӷьеишьеит агәабзиара, ақәҿиарақәа, рыгәҭакқәа рынаӡара.

Ауснагӡатә мҩаԥысуан Ацҳаражәҳәарҭа азал ду аҿы. Уа ахәыҷқәа ирзыԥшын аԥсаӡ ссир. Еиуеиԥшым аиндаҭларақәа, акәашара, ашәаҳәара, Аҵаа бабаду иҟынтәи аҳамҭа – абарҭ зегь ахәыҷқәа ргәы шьҭнахуан.
Аныҳәа хыркәшахеит убла хызкуаз асалиут ала.