Жәабран 26 рзы Стампыл ақалақь аҿы апартиа «Ватан» аофис аҟны имҩаԥысит Ҭырқәтәылатәи Ареспубликаҿы иҟоу Аԥсны Аҳәынҭқарра Ахаҭарнакра ахаҭарнакцәеи Аԥсны Жәлар реизара адепутатцәа А. Логәуеи, Н. Смыри, В. Бебиеи апартиа «Ватан» ахантәаҩы Догу Перенчеки реиԥылара.

Аиԥылараан Догу Перенчек иҳәеит Аԥсны Аҳәынҭқарра азхаҵара азҵаара ԥхьаҟагьы адгылара шаҭахо, абри аганахь ала иҟаҵо ашьаҿақәеи ҭырқәтәылатәи апартиақәа рнапхгаҩцәеи, ауаажәларра-политикатә еиҿкаарақәа рхаҭарнакцәеи, амаҵзуратә хаҿқәеи иареи реиԥылареи дрылацәажәеит. 

Жәлар реизара – Апарламент адепутат А. Логәуа иҳәеит Аԥсны Аҳәынҭқарреи, Урыстәылатәи Афедерациеи, Ҭырқәтәылатәи Ареспубликеи рыбжьара аизыҟазаашьақәа рырҭбаара иазырхоу аусура адгылара аҭара дшазыхио.

Уаанӡа, Бурса ақалақь Ауниверситет Улудаг аҿы имҩаԥысит Ҭырқәтәылатәи Ареспубликаҿы иҟоу Аԥсны Аҳәынҭқарра Ахаҭарнакра ахаҭарнакцәеи Аԥсны Жәлар реизара адепутатцәа А. Логәуеи, Н. Смыри, В. Бебиеи ауниверситет апроректор, апрофессор Феридун Иылмази реиԥылара. Аиԥылараан ирылацәажәан аҵараусҳәарҭабжьаратә зҵаарақәа, ҷыдала астудентцәа реимдара, арҵаҩцәа реимдараз апрограмма, ауниверситетқәа рыбжьара аусеицуразы аиқәшаҳаҭра.
Бурса ақалақь аҿы иара убасгьы имҩаԥысит аполитикатә партиа «Ватан» ахаҭарнакцәа Сиулиук Хусееин Ермани Хаджи Декташ Аикути рԥылара. АИХ рхархәарала Аԥсны Аҳәынҭқарра аимиџь ашьҭыхра азҵаара излацәажәоз атемақәа ируакны иҟан.