Цәыббра 14, 2022 шықәсазы Аԥсны Адәныҟатәи аусқәа рминистрраҟны имҩаԥысит Аԥсны Адәныҟатәи аусқәа рминистр ихаҭыԥуаҩ Иракли Ҭыжәбеи Женеватәи аиҿцәажәарақәа рыцхантәаҩцәа–ЕАР ахаҭарнак Џьихан Султаноглу, ОБСЕ ахаҭарнак Виорел Мошану, ЕЕ ахаҭарнак Биорн Киун рԥылара.
Аԥснытәи аган ахь ала аиԥылара иалахәын: Аԥсны АШәМ ахантәаҩ ихаҭыԥуаҩ Заал Хәарцкьиа, Женеватәи аиҿцәажәарақәа рлахәылацәа, Аԥсны ААР ахаҭарнакцәа Лаша Аҩӡба, Артур Гагәылиа, Мадина Шамԥҳа.
Аконсультациақәа иртема хаданы иҟан изаамҭанытәиу женеватәи аиҿцәажәарақәа 56 –тәи рраунд амҩаԥгареи ари аформат ала ԥхьаҟагьы аусура ацашьеи.
Аԥсны Адәныҟатәи аусқәа рминистр ихаҭыԥуаҩ Иракли Ҭыжәба иазгәеиҭеит аԥснытәи аган арегион аҿы имҩаԥысуа аҭагылазаашьақәа, Қырҭтәыла аҩныҵҟаполитикатә процессқәа ишрышьклаԥшуа.
«Ҳара азхьаԥшра аҳҭоит Қырҭтәыла имҩаԥысуа аҩныҵҟаполитикатә процессқәа, Қырҭтәыла амчрақәа рхаҭарнакцәа рықәгыларақәа ҳреспублике, уи ашәарҭадареи, аимаки рганахь ала. Ааигәа анапхгаратә партиа «Грузинская мечта» ахантәаҩы Иракли Кобахиӡе аҳәамҭа ҟаиҵеит Қырҭтәыла «аҩбатәи афронт» аартразы ареферендум мҩаԥгахар шалшо. «Аҩбатәи афронт» ҳәа уажә идырҳауҳаууа закәу еилаҳкаауеит, агәҭынчымрагьы ҳазцәырнагоит» ҳәа иҳәеит иара.
Ҭыжәба ацхантәаҩцәа ааԥхьара риҭеит асеиԥш иҟоу ашәарҭарақәа ирызхьаԥшларц, арегион аҿы аимак ԥхьаҟатәи аесколациа алыдмыршарц, Қырҭтәыла арратә мчхара арегион аҿы аҭышәынтәалара шыҵнашәаауа азгәарҭарц.
«Мышқәак раԥхьа ихыркәшахеит НАТО анапхгарала Қырҭтәыла имҩаԥысит арратә ҽазыҟаҵарақәа «Достойный партнер». Аҽазыҟаҵарақәа ирылахәын 20 тәыла рҟынтәи 2500-ҩык аррамаҵзурауаа, ҳаамҭазтәи арратә техника» ҳәа азгәеиҭеит ҭыжәба.
Иракли Ҭыжәба иазгәеиҭеит Аԥсни Қырҭтәылеи рыбжьара амч ахамырхәаразы адокумент еицақәшаҳаҭны анапаҵаҩра шхымԥадатәу.
«Ари хықәкы хадоуп. Ари ахықәкы ауп женеватәи аиҿцәажәарақәа рҿаԥхьа иқәгылоу» ҳәа иҳәеит иара.
Аиԥылара аҳәаақәа ирҭагӡаны имҩаԥысит Женеватәи аиҿцәажәарақәа ирыхәҭаку Гал ақалақь аҿы аидысларақәа разԥхьагәаҭареи раԥырҟәҟәаареи рзы ақырҭуа-аԥсуа механизм (МПРИ) аформат аусура алагара алацәажәара.
ЕАР ахаҭарнак Џьихан Султаноглу илҳәеит аиԥылара шымҩаԥысуа арегион аҿы аҭагылазаашьа аибарххара ду анамоу, аха Женеватәи аиҿцәажәарақәа разыҟаҵаразы аиԥыларақәа шымҩаԥгоу.
Ацхантәаҩцәа иазгәарҭеит аиҿцәажәарақәа изаамҭанытәиу рраунд амҩаԥгара ишазыхио.
Жәларбжьаратәи Женеватәи аиҿцәажәарақәа 56 – тәи рраунд амҩаԥгара азыԥхьагәаҭоуп 2022 шықәса, жьҭаара 5 азы.
