Хәажәкыра 30 азы Урыстәыла адәныҟатәи аусқәа рминистрраҟны имҩаԥысит Урыстәыла адәныҟатәи аусқәа рминистр ихаҭыԥуаҩ Михаил Галузини Аԥсны адәныҟатәи аусқәа рминистр ихаҭыԥуаҩ Иракли Ҭыжәбеи реиԥылара. Аԥснытәи Аган ахь ала аиԥылара далахәын Урыстәыла иҟоу Аԥсны ацҳаражәҳәаҩ Алхас Кәыҵниа.

Аиԥылараан иалацәажәан изаамҭанытәиу Женеватәи аиҿцәажәарақәа рраунд амшхәаԥштә азҵаара. Женеватәи аиҿцәажәарақәа азыԥхьагәаҭоуп 2023 шықәса мшаԥы 4-5 рзы.

Аиԥылара алахәылацәа иазгәарҭеит ишхымԥадатәиу Аԥсни Қырҭтәылеи, Аԥсни аахыҵ Уаԥстәылеи рыбжьара амчра ахамырхәаразы аиқәшаҳаҭра анапаҵаҩра.

Иара убасгьы иазгәаҭан Аԥсни Қырҭтәылеи рыбжьара аҳәаа аделимитациеи адемаркациеи шхымԥадатәиу.

Аԥснытәи аган аҽазныкгьы иазгәанаҭеит МПРИ амеханизм аиҭаусура алагара ишазыхио.

Аиԥылара алахәылацәа иара убасгьы агуманитартә ҟазшьа змоу апроблемақәа ирылацәажәеит.