Аԥсны Аҳәынҭқарра Адәныҟатәи Аусқәа рминистр Даур Ақаҩба Адипломатиатә усзуҩы имш инадҳәаланы Приднестровие Молдавиатәи ареспублика Адәныҟатәи Аусқәа рминистр Витали Игнатьев адныҳәалара изынаишьҭит.
Адныҳәалараҟны иаҳәоит:
«Адипломатиа – ари адырра, ахамеигӡара, ианаҭаху иаҭаху аӡбра адкылара алзыршо занааҭуп. Приднестровие Молдавиатәи ареспублика адипломатиатә маҵзура еснагь иҷыдараны иаман абарҭ аҟазшьақәа: аԥсадгьыл амаҵ аура, аԥшьгамҭақәа хра рыҭара, аинтересқәа рыцәхьамҵра. Приднестровие Молдавиатәи ареспублика Адәныҟатәи Аусқәа рминистрра ашьақәгыларатә мҩа ду ианысит. Актәи амшқәа инадыркны иара аусура азырхан ареспублика жәларбжьаратәи аренаҟны ахьӡ аӡыргара.
Аԥсны-приднестровиатәи аизыҟазаашьақәа аиҩызаратә ҟазшьа рыманы иҿиоит. Ҳара ҳадәныҟаполитикатә усбарҭақәа рыбжьара иҟоу адиалог ахәшьара ҳарак асҭоит. Агәра згоит уи алшара дуқәа шамоу, ҳажәларқәа реизҳазыӷьаразы аԥсҭазаара ишаларҵәахо».