Аԥсны Адәныҟатәи аусқәа рминистр Инал Арӡынба Аԥсны иҟоу Приднестровиатәи Молдавиатәи ареспублика Ахаҭарнакра аофициалтә еиҳабы Гарри Кәыпалба идиныҳәалеит Аԥсни Приднестровиеи Аиҩызареи аусеицуреи рзы Аиқәшаҳаҭра рыбжьарҵеижьҭеи 30 шықәса аҵра амш.

Адныҳәалараҿы иазгәаҭоуп:

«Арыцхә – ажьырныҳәа 22 1993 шықәса Аԥсни Приднестовиеи реизыҟазаашьаҿ иналукааша иреиуоуп. Абри аҽны анапы аҵаҩын Аԥсны Аҳәынҭқарреи Молдавиатәи Приднестровиатәи Ареспубликеи рыбжьара аиҩызареи аусеицуреи рзы Аиқәшаҳаҭра. Ари адокумент уасхырс иаиуит аҳәынҭқаррабжьаратә еизыҟазаашьа шьахә, ахы акит атәылақәа рыбжьара аусеицура арҿиара.

Ҳаҭыр зқәу Гарри Сергеи-иԥа, шәара аԥсны-приднестровиатә еизыҟазаашьақәа рырӷәӷәараҿы шәлагала дууп, шәҟазара ду, шәԥышәа ду ԥхьаҟагьы ҳажәларқәа рыбжьара аимадареи аиҩызареи русхк аҟны шәхы ишашәырхәо агәра аагоит.

Аԥсны Аҳәынҭқарра ахәшьара ҳараки аҵак дуи аманы иахәаԥшуеит Аԥсны Аҳәынҭқарреи Приднестровиатәи Молдавиатәи Ареспубликеи ирыбжьоу аиашьаратә еизыҟазаашьақәа. Урҭ ԥхьаҟагьы ишеизҳауазы агәрагара ҳамоуп.»