Аԥсны Адәныҟатәи аусқәа рминистрра ахҳәаа

Аԥсны Адәныҟатәи аусқәа рминистрра ахҳәаа
7 July 2020 1174

Урыстәылатәи АИХқәак рҟны ицәырҵит аинформациа, ашәҟәыҩҩы Захар Прилепин напхгара зиҭо аполитикатә партиа «За правду» алхраԥхьатә программаҿы Аԥсни Аахыҵ Уаԥстәылеи Урыстәыла радларазы ареферендум мҩаԥгазарц ажәадгала ҟанаҵоит ҳәа.

Урыстәыла аполитикатә партиа алхраԥхьатә программа иаҳҭанарххеит еиуеиԥшым ауаажәларратә еиҿкаарақәеи апартиақәеи рхадацәа рахь ааԥхьара аҟаҵара – еиҳа инарҭбааны зыӡбахә рҳәо аҳәынҭқаррақәа рполитикатә статуси рыспецификеи ҭырҵааларц.Аԥсны Аҳәынҭқарра 1993 шықәса раахыс исуверену, ихьыԥшым ҳәынҭқарроуп.

Аԥсны асуверентә политикатә статус арбоуп 1994 шықәса рзы ирыдкылаз Аконституциеи 1999 шықәса рзы ареферендум амҩаԥгарала ирыдкылаз аҳәынҭқарратә хьыԥшымраз Акти рҿы.

2008 шықәса рзы Аԥсны Аҳәынҭқарра ахьыԥшымра Урыстәылатәи Афедерациа ианазханаҵа ашьҭахь атәылақәа рыҩба рыбжьара аизыҟазаашьақәа аиқәшаҳаҭра-зинтә шьаҭеи аиҩызаратә шьаҭеи роуит. Аҳәынҭқаррабжьаратә еизыҟазаашьа ҳәаақәызҵо еиқәшаҳаҭра хаданы иҟоуп 2008 шықәса цәыббра 11 рзы анапы зҵаҩыз Аиҩызареи, аусеицуреи, аицхыраареи рзы аиқәшаҳаҭреи 2014 шықәса абҵара 24 рзы анапы зҵаҩыз Аиҩызареи астратегиатә партниорреи рзы аиқәшаҳаҭреи. 

Урыстәылатәи Афедерациа Аԥсны ихьыԥшым ҳәынҭқарраны ашьақәгылараҿи жәларбжьаратәи апозициақәа рырӷәӷәараҿи асоциал-економикатә ҿиараҿи ацхыраара ду ҟанаҵоит.

Аԥсуа-аурыс ҳәынҭқаррабжьаратә еизыҟазаашьақәа реиҩызаратә ҟазшьа Аԥсны Аҳәынҭқарра ашәарҭадареи аекономикатә ҿиареи еиҿыркаауеит, Аԥсны иқәынхо ажәлар ргәазыҳәара аанарԥшуеит.

Убри аан Аԥсны Аҳәынҭқарра ҳаҭырла иаднакылоит егьырҭ аҳәынҭқаррақәа ртәылауаа аҽа ҳәынҭқаррак ма ҳәынҭқаррабжьаратә еидҵарак алаларазы ргәазыҳәара.

Иҵоуроу азхьарԥшқәа

 
 
 
X

Форма обратной связи

ФИО:
E-MAIL:
Телефон:
Ваше сообщение: