Аԥсны Адәныҟатәи аусқәа рминистрра гәалсра дула ирыдыркылеит адипломат, Аԥсны зҽаԥсазтәыз ажурналист, аҭоурыхтә ҭҵаарадыррақәа ркандидат, ауаажәларратә усзуҩ, Асовет Еидгылеи Аԥсни ажурналистцәа реидгылақәа рлахәыла, Аԥснытәи АССР иреиҳаӡоу Ахеилак ахь хынтә депутатс иалырххьаз, 1994 - 2014 шықәсқәа рзы Ҭырқәтәылатәи ареспубликаҿ Аԥсны Ахаҭарнакс иҟаз Владимир Аҩӡба иԥсҭазаара далҵит ҳәа иааҩыз ашәаџь.
Владимир Џьамал-иԥа Ҭырқәтәылатәи Ареспубликаҿы Аԥсны Аҳәынҭқарра Ахаҭарнакра аԥҵара ахыҵхырҭаҿы игылаз дреиуан. Илагала дуӡӡоуп аԥсуа диаспореи ҳареи ҳаинырраҿы, Ҭырқәтәыла аиҳабыреи ҳареи ҳаимадара алыршараҿы.
Иара оумашәа дақәшәаны идыруан адипломатиатә усура аҷыдарақәа, Аԥсны ахьӡ-аԥша, аинтересқәа еснагь адгылара риҭон, иӡыригон.
Иԥсадгьыл апатриотк иҳасаб ала, аинтеллект ҳарак, аҟәыӷара змоу аӡә иакәны аԥсуа дипломатиатә школа аҿиараҿы илагаламҭа шьардаӡоуп.
Иџьабаа азгәаҭаны ианашьан аорденқәа "Ахьӡ-аԥша" III аҩаӡара, "Аҳаҭыртә дырга", СССР амедалқәа.
Владимир Џьамал-иԥа ихьӡ ахааназ еицакра амамкәа аԥсуа дипломатиа аҭоурых иазаанхоит, аԥсадгьыл гәык-ԥсык ала амаҵ аура иашьанахаҭаны.
Аԥсны Адәныҟатәи аусқәа рминистрра анапхгареи аколлективи аԥсуа жәлар рҵеи иаша Владимир Џьамал-иԥа Аҩӡба иҭаацәа ргәырҩа рыцеиҩыршоит.