Урыстәылатәи Афедерациа Адәныҟатәи аусқәа рминистр Сергеи Лавров Аԥсны Аҳәынҭқарра Адәныҟатәи аусқәа рминистр Инал Арӡынба ихьӡала адныҳәаларатә шәҟәы ааишьҭит.
Аашьҭымҭаҿы иҳәоуп:
«Ҳаҭыр зқәу Инал Бату-иԥа, ишәыдысныҳәалоит Аԥсны Аҳәынҭқарра Адәныҟатәи аусқәа рминистрс шәыҟалара!
Ареспублика аҿаԥхьа иқәгылоуп иара жәларбжьаратә апозициақәа рырӷәӷәареи арегионалтә ҭышәынтәалареи ашәарҭадареи ирзырхоу аус дуқәа.
Урыстәылатәи аган арҭ ахықәкқәа рынагӡаразы ганрацәалатәи ацхыраара аҟаҵара ԥхьаҟагьы имҩаԥнагалоит» ҳәа.
Инал Арӡынба Аԥсны Аҳәынҭқарра Адәныҟатәи аусқәа рминистрс дҟаҵан 2021 шықәса абҵара 17 азы, Аԥсны Аҳәынҭқарра Ахада иусԥҟала.