Аԥсны адәныҟатәи аусқәа рминистр Даур Ақаҩба усутә визитла Ареспублика Никарагуа даҭаауеит Асандинисттә револиуциа 40-шықәса ахыҵра иазкны имҩаԥгахо ауснагӡатәқәа аҽрылархәразы.
Авизит аҳәаақәа ирҭагӡаны иазыԥхьагәаҭоуп атәыла анапхгара рԥылара. Аиԥыларақәа раан ирылацәажәахоит ԥхьаҟатәи Аԥсны-Никарагуатәи аизыҟазаашьақәа.
Асандинисттә револиуциа - ԥхынгәы 19 1979 шықәса рзы Анастасио Сомоса ирежим ахҳәара иаԥхьанеиуаз аусқәа.
Цәыббра 3 2008 шықәса рзы Ареспублика Никарагуа Аԥсны Аҳәынҭқарра ахьыԥшымра азханаҵеит. Цәыббра 10 2009 шықәса рзы Аԥсни Никарагуеи адипломатиатә еизыҟазаашьақәа рыбжьарҵеит.