Аԥсны Аҳәынҭқарра Адәныҟатәи аусқәа рминистр Инал Арӡынба Приднестровиатәи Молдавиатәи Ареспублика Адәныҟатәи аусқәа рминистр Витали Игнатьев идиныҳәалеит ПМР ААР ашьаҭаркра 30 шықәса ахыҵра.

Адныҳәалараҿы иаҳәоит:

"Приднестровие Адәныҟатәи аусқәа рминистрра аԥҵан ареспубликаз адраматә ҟазшьа змаз аамҭаз. Ари еиҳагьы аҵакы анаҭоит аминистрра, ареспублика аинтересқәа рырӷәӷәараҿы ароль шьҭнахуеит.

Приднестровиатәи адипломатиа хьӡы-ԥша аманы атәыла адәныҟаполитикатә курс мҩаԥнагоит, иара асуверинитет, арегионалтә шәарҭадара, аҭышәынтәалара аиҿкаараҿы алагала ду ҟанаҵоит.

Аминистрра аколлектив зажәеи зуси еимадоу, ззаанаҭ здыруа профессионалтә командоуп, амилаҭтә интересқәа ирыҵагылоит, аҳәынҭқарра апозициа арӷәӷәаразы аусура мҩаԥнагоит.

Иазгәаҭатәуп Аԥсны Аҳәынҭқарреи Приднестровиатәи Молдавиатәи Ареспубликеи рыбжьара ишышьақәгыло аиҩызара, аилибакаара, агәреибагара шьаҭаны измоу аизыҟазаашьа ҟәандақәа.

Аусбарҭабжьаратә диалог ахә ҳаракны ишьо иазгәаҳҭоит инарҭбаау аусеицура ҳшазыхиоу».