Лаҵара 21 азы Аԥсны адәныҟатәи аусқәа рминистрраҿы имҩаԥысит онлаин-еиԥылареи Аԥсны Аҳәынҭқарреи Приднестровиатәи Молдавиатәи ареспубликеи руаажәларратә палатақәа рыбжьара аилибакаареи аусеицуреи рзы Амеморандум анапаҵаҩреи.
Аиԥылара иалахәын: Аԥсны адәныҟатәи аусқәа рминистр ихаҭыԥуаҩ
Одиссеи Бигәаа, Приднестровиатәи Молдавиатәи ареспублика адәныҟатәи аусқәа рминистр ихаҭыԥуаҩ Александр Стециук, Аԥсны Аҳәынҭқарраҿы иҟоу Приднестровиатәи Молдавиатәи ареспублика ахаҭарнак Александр Ватаман, Приднестровиатәи Молдавиатәи ареспубликаҿ Аԥсны Ахаҭарнакра ахада Гарри Купалба.
Ауаажәларратә палатақәа рыхьӡала аиԥылара иалахәын Аԥсны Аҳәынҭқарра Ауаажәларратә палата амаӡаныҟәгаҩ Гули Кьычба, ауаажәларратә палата амаӡаныҟәгаҩ лхаҭыԥуаа Александр Страничкин, Витали Смыр, Приднестровиатәи Молдавиатәи ареспублика Ауаажәларратә палата ахантәаҩы Владимир Ладункин, Приднестровиатәи Молдавиатәи ареспублика Ауаажәларратә палата амаӡаныҟәгаҩ Инга Кузенко.
