Урыстәыла Мраҭашәара иадҟанаҵалаз асанкциақәа ирыхҟьаз агеополитикатәии аекономикатәии ҭагылазаашьақәа Аԥсны аекономикахь аинвестициақәа ринтерес цәырыргеит. Убри инадҳәаланы Аԥсны Аҳәынҭқарра аинвестициатәии атуристтәии хьӡы аиӷьтәразы, аҳәаанырцәтәи аинвестициақәа радыԥхьаларазы иаԥҵахоит иааиԥмырҟьаӡакәа аус зуа аимак-аиҿактә ҭыԥ «Аԥснытәи аинвестициатә форум». Афорум мҩаԥыслоит ахәаахәҭра-економикатәии аинвестициатәии усхкқәа рҟны Аԥсны ианыруа Урыстәыла арегионқәа рҿы.

Иарбанызаалак афорумқәа рҳәаақәа ирҭагӡаны иазыԥхьагәаҭоуп зхаҭабзиара ҳараку, Аԥсны иазку амультимедиатә контент аӡыргара абизнес-еилазааразы. Иӡыргахоит Аԥсны аинвестициатә, аекономикатә, атранзиттә лшарақәа.

Раԥхьатәи "Аԥснытәи аинвестициатә форум" мҩаԥгахоит асабша, мшаԥы 2, 2022 шықәса азы, Шәача, аотель «Hyatt Regency Sochi» аҿы.

Ауснагӡатә мҩаԥгахоит Аԥсны ААР адгыларала. Афорум иалахәхоит Аԥсны ААП, Аекономика аминистрраҿы иаԥҵоу аинвестициатә маҵзура, аԥснытәии урыстәылатәии анаплакыҩцәа рхаҭарнакцәа.

Иахьазы Адәныҟатәи аусқәа рминистрра афорум амҩаԥгаразы аилацәажәарақәа мҩаԥнагоит Московатәи, Тулатәи, Ростовтәи аобластқәа, Санкт-Петербург уҳәа рҿы.

Афорум аихшьаалақәа рыла регион-цыԥхьаӡа рҿы еиҿкаахоит аусутә гәыԥқәа, Аԥсныҟа аинвестициақәа радыԥхьалара аус адызуыло.