Даур Ақаҩба Аԥсуа культуратә центрқәа рахь иааԥхьара

Даур Ақаҩба Аԥсуа культуратә центрқәа рахь иааԥхьара
16 November 2019 188

Абҵара 16 рзы Ҭырқәтәыла Адаԥазары (Сакариа) имҩаԥысит Ҭырқәтәыла иҟоу Аԥсуа культуратә центрқәа Рфедерациа изаамҭанытәиу 6-тәи апленартә еилатәара.

Аԥсны адәныҟатәи аусқәа рминистр Даур Ақаҩба инашьҭымҭа шәҟәы даԥхьеит Ҭырқәтәылатәи Ареспубликаҿы Аԥсны Ахаҭарнакра ҩ-ганктәи аизыҟазаашьақәа рзы абжьгаҩ Асҭамур Багаҭелиа.

Ҳаҭыр зқәу ҳџьынџьуаа, ҳашьцәа, ҳаҳәшьцәа!

Азин сышәҭ гәык-ԥсык ала аԥсшәа шәаҳәо ишәзеиӷьасшьарц Ҭырқәтәыла иҟоу Аԥсуа культуратә центрқәа Рфедерациа изаамҭанытәиу 6-тәи апленартә еилатәара хра аманы амҩаԥгара.

Ҭырқәтәыла иҟоу Аԥсуа культуратә центрқәа Рфедерациа аиҿкаара аԥхьатәи амшқәа инадыркны аԥсуа диаспора Ҭырқәтәылеиԥш егьырҭ атәылақәа рҿгьы реидкылараз алшамҭақәа дууп.

Афедерациа уаанӡатәи ахантәаҩцәеи Анапхгаратә хеилакқәеи рылшара иахьа Афедерациа алахәуп Аԥсны Аҳәынҭқарраҿ имҩаԥысуа аусқәа зегьы ҳәа аҳәара азин аҳнаҭоит. Афедерациа Ҭырқәтәыла имҩаԥнаго аусура акәзар Аԥсны Аҳәынҭқарреи Ҭырқәтәылатәи ареспубликеи ргәылеимабзиара еиҳа-еиҳа иарҿиоит.

Афедерациа анапхгара – аҳаҭыр ду шамоу еиԥш аҭакԥхықәра дугьы амоуп. Афедерациа рнапхгара аҿаԥхьа иқәгылоит Ҭырқәтәыла аҵакыраҿы аԥсуа бызшәеи аԥсуа культуреи раларҵәара аус, дарбанызаалак адиаспора ахаҭарнак иҟынӡа иҭоурых ԥсадгьыл аӡбахә анагара.

Аиҳарак ари ҭакԥхықәроуп ҳажәлар реизҳазыӷьара зҭахым ауаа анырацәоу аамҭазы. Зегьы еицыжәдыруеит ҳаӷацәа ҳаиашьаратә жәларқәеи ҳареи агәыҩбара ҳабжьарҵарц азы имҩаԥырго рҽазышәарақәа. Иахьатәи аамҭазы аԥсуаа реиԥш Кавказ егьырҭ ажәларқәа рызгьы ашәарҭара рыҵоуп иныҭкааны изызхәыцым ашьаҿақәа, ахымҩаԥгашьақәа.

Ҳара еснагь иаҳгәалашәозароуп аԥсуааи ачерқьесқәеи еиҟәшашьа змам аиашьаратә жәларқәа ракәны ишыҟоу. Иарбан аамҭа уадаҩзаалак аԥсуаа зҭагылалак, уи рыцеиҩыршон рашьцәа – ачерқьесқәа.

Акраҵанакуаны иҟоуп аӡәы иажәа еижьага ацымныҟара. 

Ҳаҭыр зқәу сџьынџьуаа,

Ҭырқәтәыла иҟоу Аԥсуа культуратә центрқәа Рфедерациа аԥсуа диаспора иналукааша, зымч-зылша аԥсуа жәлари Аԥсны Аҳәынҭқарреи реизҳа-зыӷьара иазку уаажәларратә еиҿкаароуп. 

Аԥсны адәныҟатәи аусқәа рминистрра Аԥсуа культуратә центрқәа русура уаанӡатәи аамҭақәа раан активла ирылахәыз ҭабуп ҳәа шәанаҳәоит имҩаԥыжәгоз ҳусеицуразы, агәыӷра амоуп иахьа иалырхуа анапхгареи ахантәаҩ ҿыци Афедерациа уаанӡа изныз амҩа ишану ақәҿиарақәа рԥеиԥшхап ҳәа.

Аԥсны адәныҟатәи аусқәа рминистрра ԥхьаҟагьы Ҭырқәтәылеи егьырҭ адунеи атәылақәеи рҿы иҟоу аԥсуа диаспора рџьынџь – Аԥсни дареи реинырра еиԥымҟьарц иалшо зегь ҟанаҵалоит.

Ишәзеиӷьасшьоит аҭынчра, аманшәалара, ақәҿиарақәа.

Ҳаҭырла, 

Аԥсны адәныҟатәи аусқәа рминистр 

Даур Ақаҩба.

Иҵоуроу азхьарԥшқәа

 
 
 
X

Форма обратной связи

ФИО:
E-MAIL:
Телефон:
Ваше сообщение: