Лаҵарамза 25 азы адунеи аҿы иазгәарҭоит Африка Амш.

Аԥсны адәныҟатәи аусқәа рминистр Инал Арӡынба африкатәи аҩызцәеи апартниорцәеи ари амш рыдиныҳәалеит.

«Ари африкатәи аконтинент аколонизм аиааиреи африкатәи ажәларқәа аҭынчреи аизҳазыӷьареи рашьҭазаареи символра зуа ихадоу ныҳәоуп», –ҳәа иазгәеиҭеит аминистр.

Ҳазҭоу ашықәс ԥхынгәымзазы Аԥснытәи аделегациа Санкт-Петербург ақалақь, аҩбатәи асаммит «Урыстәыла-Африка» аҳәаақәа ирҭагӡаны имҩаԥысуа афорум «Урыстәыла-Африка» аусура иалахәхоит.

«Урыстәылатәии белорустәии ҳҩызцәа активла Африка аус ацура мҩаԥыргоит. Уи ахәаахәҭра-економикатә, аинвестициатә, агуманитартә, аҳәынҭқаррабжьаратәи аусеицура ауп. Ҳара, Аԥсны Аҳәынҭқарра аҳасабала ас еиԥш адиалог шьаҿа-шьаҿала ашьақәыргылара азы алшарақәа зегьы ҳамоуп. Африка аус ацура аперспектива злоу ҳусура иахырхарҭаны ҳахәаԥшуеит», – ҳәа инаҵшьны иазгәеиҭеит адәныҟатәи аусқәа рминистр Инал Арӡынба.