Жьҭаара 19 азы Аԥсны Адәныҟатәи аусқәа рминистрраҟны имҩаԥысит Аԥсни Никарагуеи рыбжьара авидеоконференциа. Аганқәа рҟынтәи авидеоконференциа иалахәын акультура, аҵарадырра, аспорт русхкқәа рхаҭарнакцәа.
Амшхәаԥштә азҵаара ҳәа иалацәажәан аминистррақәа рыбжьара аинырра ашьақәгылашьеи 2022 шықәсазтәи ауснагӡатәқәа рыплан аус адулареи.
Аԥсны ААР ахада иазгәеиҭеит Аԥсны Аҳәынҭқарреи Ареспублика Никарагуеи рыбжьара аиныррақәа хра рыманы ишыҟоу, ԥхьаҟатәи аусқәа рзгьы ажәалагалақәа шазырхио, 2022 шықәсазтәи ауснагӡатәқәа рыплан акәзар апроект хара имгакәа Никарагуатәи аган ишазынашьҭхо.
Никарагуатәи аган иазгәанаҭеит ишазыхио аусеицура апунктқәа зегьы рықәныҟәара. Убри аан иара аԥсуа ган иаднагалеит ақәшаҳаҭразы аспорттәи, аҵаратәи, акультуратәи уснагӡатәқәа рыпроектқәа.
Аԥсны акультуреи, аспорти, аҵареи русбарҭақәа рхаҭарнакцәа ирҳәеит 2022 шықәсазы иарбоу ауснагӡатәқәа рҳәаа иҭагӡаны ишазыхио еиҳа еизааигәаны аусеицура.
Аганқәа иазгәарҭеит хара имгакәа ишышьаҭарктәу Ареспублика Никарагуа аҿы Аԥсны Аҳәынҭқарра Ацҳаражәҳәарҭа, еиуеиԥшым ахырхарҭақәа рҿы аусеицура еиҳа арҭбаарази арҵауыларази.