Ԥхынгәы 17, Ареспублика Никарагуа Асандинисттә революциа 41-шықәса ахыҵра аламҭалазы Аԥсны Адәныҟатәи аусқәа рминистрра аԥшьгарала имҩаԥган Аԥсны Аҳәынҭқарраҿ иҟоу Ареспублика Никарагуа Ацҳаражәҳәаҩ Альба Асусена Торрес Мехиа ивидеоконференциа.

Ауснагӡатә иалахәын Аԥсны Адәныҟатәи аусқәа рминистр ихаҭыԥуаҩ Иракли Ҭыжәба, Латинтәи Америкеи, Азиеи, Азиа-Аокеанҭынчтәи арегион адепартамент аиҳабы Мадина Зыхәԥҳа, Аԥсны иҟоу Никарагуа аҳаҭыртә консул Алиас Ҳашба.

Иракли Ҭыжәба Аԥсны Адәныҟатәи аусқәа рминистрра ахьӡала Ацҳаражәҳәаҩи Никарагуа ажәлари ирыдиныҳәалеит Ареспублика Никарагуа Асандинисттә революциа 41-шықәса ахыҵра, Ацҳаражәҳәаҩ ҷыдала иҭабуп ҳәа иеиҳәеит аԥсны-никарагуатә еизыҟазаашьақәа рахь илагала ду азы.

«Ҳара иҭабуп ҳәа шәаҳҳәоит иҟашәҵо адгыларази шәпозициази. Ԥхьаҟагьы ҳазыхиоуп ҩ-ганктәи аизыҟазаашьақәа рырҿиара» ҳәа иҳәеит аминистр ихаҭыԥуаҩ.

Аԥсны Аҳәынҭқарраҿ иҟоу Ареспублика Никарагуа Ацҳаражәҳәаҩ Альба Асусена Торрес Мехиа аԥснытәи иколлегацәа аԥсшәа реиҳәеит никарагуажәлар рыхьӡала. «Ҳаҭыр зқәу аԥснытәи ҳҩызцәа, ишәыдышәкыл аникарагуа жәлар рыхьӡала асалам. Ареспублика Никарагуа Асандинисттә революциа 41-шықәса ахыҵра азгәаҳҭоит, абри амш азы 1979 шықәсазы адиктатор Анастасио Самоса Никарагуа ааныжьны дықәҵит» ҳәа иҳәеит иара.

Авидеоконференциаан Ареспублика Никарагуа Ацҳаражәҳәаҩ Альба Асусена Торрес Мехиа иҩызцәа официалла дыдирдырит Аԥсны иҟоу Никарагуа аҳаҭыртә консул Алиас Ҳашба.