"Аԥснытәи аинвестициатә форум" раԥхьаӡа акәны Шәача иаатит

"Аԥснытәи аинвестициатә форум" раԥхьаӡа акәны Шәача иаатит
2 April 2022 283

Аԥсны аинвестициақәа ралагаларазы ихьазырԥшуа Афорум аатит Шәача асасааирҭа "Hyatt Regency Sochi" аҿы асабша, мшаԥы 2 рзы.

Аусмҩаԥгатә иалахәын Аԥсны Адәныҟатәи аусқәа рминистр Инал Арӡынба, Аԥсны Ахәаахәҭра-ааглыхратә палата аиҳабы Ҭамила Мерцхәлааԥҳа, аҳәынҭусбарҭақәа русзуҩцәа, амедиагәыԥ "Россия сегодня" аредактор хада Маргарита Симониан, «Шәача ақалақь Ахәаахәҭра-Ааглыхратә Палата» Ахеилак ахантәаҩы Тарас Иарош, аилахәыра AR-GROUP ахада Аик Зебелиан, иара убас аԥснытәии урыстәылатәии анаплакыҩцәа.

"Иахьа ҳара "Аԥснытәи аинвестициатә форум" актәи аилатәара мҩаԥаагоит. Ҳаԥхьа дҵа хадас иқәҳаргыло - Аԥсны иҟаҵәҟьоу аҭагылазаашьа аарԥшра, закәанԥҵаратә аԥшьгамҭақәас иҳамоу, иахьатәи аамҭазы имҩаԥысуа ахҭысқәа раан ҳара ҳҿы процессқәас иҟоу", - иҳәеит афорум аартраан Аԥсны Адәныҟатәи аусқәа рминистр Инал Арӡынба.

Мраҭашәара аганахьала асанкциақәа аналагалоу аамҭазы Аԥсны аинвесторцәа рзы еиҳагьы аинтерес аиур алшоит ҳәа иаҵишьит Арӡынба.

Убри азоуп, аминистр иажәақәа рыла, еиуеиԥшым арегионқәа рҿы аинвестициатә форум амҩаԥгара зыӡбаз, уи аҳәаақәа ирҭагӡаны Аԥсны иҟоу аҭагылазаашьа аӡбахә ҳәалазарц, аинвестициақәа радԥхьалара аизырҳаразы ҳтәыла иҟанаҵо ашьаҿақәа цәыргалазарц.

Аԥсны ААР ахада Инал Арӡынба иажәақәа рыла, ари аҩыза аусутә формат ҿыц адҵа хадақәа ируакуп Аԥсны аинвестициатә потенциал ацәыргара.

"Қырҭтәыла хықәкыла агибридтә информациатә еибашьра мҩаԥнагоит. Ганкахьала, иара Аԥсни уи аиҳабыреи рыхьӡ бжьнахуеит, ирыдыркыло аӡбамҭақәа рҵакы ладырҟәуеит, даҽа ганкахьала - аҭынч еиҿцәажәарақәа рыӡбахә аҳәоит. Хымԥада, абри аҩыза аҭагылазаашьаан ҳара хықәкы хадас иҳамоуп Аԥсны Аҳәынҭқарра иазку иобиективтәу, ииашоу адыррақәа ауаажәларра рызнагара. Афорум аҳәаақәа ирҭагӡаны ҳара абри аус ҳнапы ааҳкуеит Урыстәыла арегионқәа рҿы", - иҳәеит Аԥсны адәныҟаполитикатә усбарҭа аиҳабы.

Аԥсны Ахәаахәҭра-ааглыхратә палата аиҳабы Ҭамила Мерцхәлааԥҳа иазгәалҭеит Аԥсни Урыстәылеи рпалатақәа реимадара аҭыԥ ду шааннакыло аҩ-тәылак рбизнес аҟны русеицураҿы.

Шәача иаатыз "Аԥснытәи аинвестициатә форум" аусутә гәыԥ напхгаҩыс даиуит Аик Зебелиан, аилахәыра AR-GROUP аиҳабы.

Амедиагәыԥ "Россия сегодня" аредактор хада Маргарита Симониан лажәақәа рыла «Аԥсны ашәҭыкакаҷра азыԥшуп».

Аԥсны аусура даара иманшәалоуп иҳәеит атуристтә комплекс "Тамшь Village" аиҳабы Константин Новиков Шәача имҩаԥысуа "Аԥснытәи аинвестициатә форум" аан дықәгыло.

Аԥсны ААР рыҿцәажәоит Москватәи, Тулатәи, Ростовтәи аобластқәа, Санкт-Петербург, егьырҭ Урыстәыла асубиектқәа рхадацәа "Аԥснытәи аинвестициатә форум" дара рҿы амҩаԥгара алыршаразы.

Аԥсны Адәныҟатәи аусқәа рминистрра  ҭабуп ҳәа ахнаҳәаауеит «Шәача ақалақь Ахәаахәҭра-Ааглыхратә Палата» Афорум аусура иахьалахәызи активла ацхыраара ахьымҩаԥнагози рзы.

Иҵоуроу азхьарԥшқәа

 
 
 
X

Форма обратной связи

ФИО:
E-MAIL:
Телефон:
Ваше сообщение: