Ааигәа ареспубликаҟны аҭыԥ змаз атрагедиатә хҭысқәа ауаажәларра-политикатәи аинформациатәи резонанс цәырыргеит. Аԥсны Адәныҟатәи аусқәа рминистрраҿы гәалсра дула ирыдыркылеит ҭаацәала Аԥсны зыԥсы зшьоз Урыстәыла атәылауаҩ ишьра.

Иазгәаҭатәуп Аԥсны Аҳәынҭқарра анапхгара ацәгьоура аарԥшреи ацәгьоуцәа раанкылареи рзы иахәҭаны иҟаз ауснагӡатәқәа нап шыднаркыз. Имҩаԥгаз аоператив-ԥшааратә уснагӡатәқәа ирылҵшәаны ацәгьоуцәа аанкылоуп.
Абасеиԥштәи аҭагылазаашьа аан агәҭынчымра узнарҵысуеит еиуеиԥшым амассатә информациа ахархәагақәак иҟалаз арыцҳара рхы иархәаны Аԥсны иазкны цәымӷрала иҭәу анегативтә материалқәа ахьыркьыԥхьуа.

Иара убасгьы игәоумҭарц залшом Аԥсны акәша-мыкәша аҵыхәтәантәи аамҭазы ицәырҵуа ишалагаз ҷыдала иҿаҵоу анегативтә материалқәа, аиҳаракгьы иҳәынҭқарратәым урыстәылатәи аинформациатә маҵзурақәа рҟынтәи.

Абри инадҳәаланы амассатә информациа ахархәагақәа рхаҭарнакцәа шәахь ааԥхьара ҟаҳҵоит ҳреспубликаҿы иҟало ахҭысқәа рылацәажәараан аобиективтә информациа ахархәара ашәҭарҭаларц, Аԥсны аҳаҭыр аларҟәра аҽазышәара шәацәхьаҵларц. Асеиԥш ахымҩаԥгара иахьазы иҟоу ҩ-ганктәи аурыс-аԥсуа стратегиатә еизыҟазаашьақәа рформат иаҿагылоит.