Аԥсны Адәныҟатәи аусқәа рминистр Даур Ақаҩба цәыббра 17 азы диԥылеит Аԥсны иҟоу Приднестровиатәи Молдавиатәи Ареспублика аофициалтә Хаҭарнакра аиҳабы Гарри Кәпалба.
Аицәажәараан аганқәа рыҩбагь Аԥсни Приднестровиеи русеицура аҭагылазаашьа иалацәажәеит. Иара убасгьы иазгәарҭеит Приднестровиатәи Молдавиатәи Ареспубликеи Аԥсны Аҳәынҭқарреи рыбжьара аиқәшаҳаҭра-зинтә база арҭбаареи арӷәӷәареи рхымԥадатәра атәы рҳәеит.
Ҷыдала иазааҭгылан Приднестровиатәи Молдавиатәи Ареспублика Адәныҟатәи аусқәа рминистр Витали Игнатьев Аԥсны Адәныҟатәи аусқәа рминистр Даур Ақаҩба иахь иҟаиҵаз аҳәара: 1992-1993шықәсқәа раантәи Аԥсны жәлар Рџьынџьтәылатә еибашьра иалахәыз приднестровиаа аинвалидцәа апротез рзыҟаҵареи асанитар-курорттә ԥсшьара рзеиҿкаареи азҵаара.
Приднестровиатәи аинвалидцәа апротез рзыҟаҵаразы агуманитартә проект акыршықәса ҵуеит аус ауеижьҭеи, ҩ-ганктәи аизыҟазаашьақәа шьақәзырӷәӷәо усны иҟоуп.
Аиԥылараан Даур Ақаҩба иҳәеит Аԥсны иҟоу Приднестровиатәи Молдавиатәи Ареспублика аофициалтә Хаҭарнакра аусура аҵак ду аманы дшахәаԥшуа, ԥхьаҟатәи аусеицурагьы дшақәгәыӷуа.