Хәажәкыра 28 азы Приднестровиатәи Молдавиатәи Ареспубликаҿы Аԥсны Аҳәынҭқарра ахаҭарнак Александр Ватаман, ПМР аусшәҟәқәа русбарҭақәеи архивқәеи Рҳәынҭқарратә Маҵзура аиҳабы Зинаида Тодорашко лнаԥхьарала, ашәҟәы«Без срока давности: Приднестровье» аӡыргара далахәын.
Ари ашәҟәаҿы Аџьынџьтәылатә еибашьра Дуӡӡа аан Приднестровиатәи ауааԥсыра рганахь ала анемец-румынтә мпыҵахалаҩцәа иҟарҵоз ацәгьоурақәа зегь реиҳа инарҭбааны иҭҵаауп.
Аусмҩаԥгатә рхы аладырхәит Приднестровие Актәи ахада Игор Смирнов, Приднестровие анагӡаратә, азакәанԥҵаратә, аусӡбаратә мчрақәа рнапхгаҩцәа, Урыстәыла, Белоруссиа, Аахыҵ Уаԥстәыла рдипломатцәа, егьырҭ асасцәа.
Аусмҩаԥгатә аҿы Зинаида Тодорашко Приднестровиатәи Молдавиатәи Ареспубликаҿы Аԥсны Аҳәынҭқарра ахаҭарнак Александр Ватаман ашәҟәы ҳамҭас илҭеит, убри аан иазгәалҭеит анемец-румынтә мпыҵахалаҩцәа рыцәгьоурақәа егьа аамҭа рхыларгьы ауаа ргәалашәараҿы ишаанхо.