Жәабран 20 азы Приднестровиатәи Молдавиатәи Ареспубликаҿы Аԥсны Аҳәынҭқарра азинмчы змоу ахаҭарнак Александр Ватаман, Приднестровие адәныҟатәи аусқәа рминистр иҟаиҵаз ааԥхьарала, ПМР адәныҟатәи аусқәа Рминистрра аҳасабырбатә коллегиа аилатәара ихы алаирхәит. Аусмҩаԥгатә онлаин аҟазшьала имҩаԥысит. 

2024 шықәсазы Приднестровие адәныҟаполитикатә усбарҭа аусура иазку аҳасабырбатә коллегиа аилатәара рхы аладырхәит ПМР ахада Вадим Красносельски, Приднестровие Иреиҳаӡоу Ахеилаки Аҳәынҭқарра рнапхгареи, ПМР аминистррақәеи аусбарҭақәеи рхаҭарнакцәа, Аахыҵ Уаԥстәылатәи Ареспублика адәныҟатәи аусқәа рминистр Ахсар Џьиоев, ПМР иҟоу Аахыҵ Уаԥстәылатәи Ареспублика Аофициалтә Хаҭарнакра анапхгаҩы Витали Ианковски, Урыстәылатәи Афедерациа Ацҳаражәҳәарҭа ахаҭарнакцәа уҳәа убас егьырҭгьы.

Приднестровие адәныҟатәи аусқәа Рминистрра аҳасабырбатә коллегиа аилатәараҟны ажәахәқәа ҟарҵеит: Приднестровие адәныҟатәи аусқәа рминистр Витали Игнатиев, Урыстәылатәи Афедерациа аҟынтәи АХК ахантәаҩы ицхырааҩ Александр Андреев, Аахыҵ Уаԥстәылатәи Ареспублика адәныҟатәи аусқәа рминистр Ахсар Џьиоев, Урыстәыла иҟоу ПМР Аофициалтә Хаҭарнакра анапхгаҩы Леонид Манаков.