Ԥхынгәы 21 азы Ареспублика Никарагуа иҟоу Аԥсны Аҳәынҭқарра азинмчнагӡа змоу ацҳаражәҳәаҩ Инар Ладариа идикылеит Аахыҵ Уаԥстәыла адәныҟатәи аусқәа рминистр Ахсар Џьиоеви Венесуелеи Никарагуеи иҟоу Аахыҵ Уаԥстәыла азинмчнагӡа змоу ацҳаражәҳәаҩ Нарим Козаеви.
Аахыҵ Уаԥстәылатәи адипломатцәа Никарагуа инеиит Асандинисттә революциа аиааира 45-шықәса ахыҵраз аныҳәа ахалархәраз.
Инар Ладариа асасцәа аԥсшәа раҳәо иазгәеиҭеит Аԥсны Аҳәынҭқарреи Аахыҵ Уаԥстәылеи рыбжьара аиашьаратә ҟазшьа змоу аизыҟазаашьақәа шышьақәгылоу.
Ареспублика Никарагуа иҟоу Аԥсны Аҳәынҭқарра азинмчнагӡа змоу ацҳаражәҳәаҩ Инар Ладариа иҟаиҵаз анаԥхьара ҭабуп ахҳәаауа асасцәа алацәажәеит ҩ-ганктәи аизыҟазаашьақәа распектқәа.
Аиԥылара традициа ҳасабла аԥхарра аҵаны имҩаԥысит.
