2025 шықәса ԥхынгәы 5 азы Берлин ақалақь аҿы еиуеиԥшым акультурақәеи ажәларқәеи рхаҭарнакцәа еидызкылаз аҭаҭарцәа рмилаҭтә ныҳәа «Сабантуи» азгәаҭара иазку аусмҩаԥгатә мҩаԥысит. Аусмҩаԥгатә лхы алалырхәит Германиатәи Афедеративтә республикаҿы иҟоу Аԥсны Аҳәынҭқарра азинмчы змоу ахаҭарнак Хьыбла Амҷыԥҳа.

Аԥсны Аҳәынҭқарра ахьӡала Хьыбла Амҷыԥҳа аныҳәа алахәылацәеи асасцәеи аԥсшәа раҳәо аиҿкааҩцәа гәык-ԥсык ала адныҳәаларақәа рзыҟалҵеит, аусмҩаԥгатә аҩаӡара ҳаракы азы ҭабуп ҳәа лҳәеит.

Аныҳәа аҳәаақәа ирҭагӡаны, аиҩызареи акультуратә еимдареи рдыргак аҳасаб ала, Хьыбла Амҷыԥҳа Германиа иҟоу аҭаҭарцәа реилазаара анапхгаҩцәа иналукааша аԥсуа шәҟәыҩҩы Фазиль Искандер ишәҟәы «Сандро Чегемтәи» анемец бызшәахь аиҭага ҳамҭас ирылҭеит.

Ахәылԥаз алахәылацәа гәахәарыла ирыдыркылеит Хьыбла Амҷыԥҳа илаԥҵамҭоу ҩ-музыкатә рҿиамҭак: адунеи аҿы еицырдыруа аккордеонарҳәаҩы Аидар Гаинуллини лареи еицынарыгӡаз "Кавказтәи тангои" асаксофонист Муса Малики лареи дуетла инарыгӡаз "Абзиабара мрагыларатәи амелодиеи".

Аныҳәа Германиа инхо еиуеиԥшым атәылақәа рдиаспорақәа рыбжьара аиҿцәажәарақәеи, жәларбжьаратәи аусеицуреи, ауаатәыҩсатә еизыҟазаашьақәа рырӷәӷәареи рзы иҿырԥшы бзианы иҟалеит.