2025 шықәса цәыббрамза 10 азы, Приднестровиатәи Молдавиатәи Ареспубликаҿ иҟоу Аԥсны Аҳәынҭқарра Аофициалтә Хаҭарнакраҿы, Приднестровиа иҟоу азинмчнагӡа змоу Аԥсны ахаҭарнак Александр Ватамани Приднестровиа адәныҟатәи аусқәа рминистрра аусзуҩцәа – адипломатцәа ҿарацәа Рхеилак алахәылацәеи Приднестровиантәи аҳәынҭқарратә университет афакультетқәа рстудентцәеи реиԥылара мҩаԥысит.
Александр Ватаман аиԥылара алахәылацәа инарҭбааны Аԥсны аҭоурых дирдырит, 1992-1993 шықәсқәа рзы Аԥсны жәлар рџьынџьтәылатә еибашьра, Аԥсни Приднестровиеи реизыҟазаашьақәа, Аофициалтә хаҭарнакреи адипломатиатә маҵзуреи русура атәы далацәажәеит.
Аиԥылара аҳәаақәа ирҭагӡаны, иара убас, азинмчы змоу Аԥсны ахаҭарнак адипломат ҿарацәа рызҵаарақәа рҭак ҟаиҵеит. Аицәажәараан иӡырган 2006ш. инаркны 2025ш. рҟынӡа Ахаҭарнакра аусура иадҳәалоу афотосахьақәа рцәыргақәҵа.
Адипломат иазгәеиҭеит, иҳаҩсыз ҩажәа шықәса ирылагӡаны Аԥснытәи адипломатиеи Приднестровиатәи адипломатиеи рҽазышәарақәа аиашьаратә республикақәа рыбжьара зегьрылатәи аусеицура ашьаҭа шьақәдыргылеит ҳәа.
Аиԥылара иалахәыз рыбжьара Аԥсны азы иреиӷьу аексперт иалхразы аицлабра мҩаԥган. Приднестровиатәи АҾР ахаҭарнакцәа зегьы адырра бзиақәа аадырԥшит. Аиааира игеит Аҳәынҭқарратә напхгареи, азиндырреи, асоциал-гуманитартә ҭҵаарадыррақәеи рфакультет ахԥатәи акурс астудент Илиа Шмульски. Гәларшәагас, аиааира згаз Аԥсны Аҳәынҭқарра абираҟи Астол иқәдыргыло) Аԥсны адәныҟатәи аусқәа рминистрра атетради ианашьан.
