2025 шықәса цәыббрамза 18 рзы, Приднестровиатәи Молдавиатәи Ареспублика иҟоу Аԥсны Аҳәынҭқарра аофициалтә Хаҭарнакра аԥшьгарала, Аԥсны Аҳәынҭқарра аҵарадырра аминистр Хана Гәынбеи Приднестровиатәи Молдавиатәи Ареспублика аҵарадырра аминистр Светлана Иванишинеи онлаин-еиԥылара еиԥылеит.

Аиԥылара рхы аладырхәит Приднестровиатәи Молдавиатәи Ареспублика иҟоу азинмчнагӡа змоу Аԥсны ахаҭарнак Александр Ватаман, Аԥсны иҟоу Приднестровиатәи Молдавиатәи Ареспублика аофициалтә Хаҭарнакра анапхгаҩы Гарри Кәпалба, Аԥсны аҵарадырра аминистрра азеиԥш, абжьаратә, азанааҭтә ҵарадырра аҟәша аиҳабы Маиа Цыбулевскаиа.

Хана Гәынбеи Светлана Иванишиниеи реиԥылараан Аԥсни Приднестровиеи рҵарадырратә системақәа иахьатәи рҭагылазаашьазы адыррақәа еимырдеит, аминистррақәа русураҿы хра злоу, еицырзеиԥшу аинтерес ззыҟоу ахырхарҭақәа азгәарҭеит. Аусбарҭақәа рнапхгаҩцәа аринахыстәи аусбарҭабжьаратә усеицура аԥҟара шьақәдыргылеит.

Аиԥылара мҩаԥысит аԥхарреи аиҩызаратә ҭагылазаашьеи аманы.