2024 шықәса абҵарамза 30 азы Никарагуа имҩаԥысит адунеи ажәларқәа ргастрономиеи рытрадициақәеи рцәыргақәҵа. Аԥсны Аҳәынҭқарра ахаҭарнакс ацәыргақәҵа иалахәын Никарагуа иҟоу Аԥсны Ацҳаражәҳәарҭа. Ацәыргақәҵаҿы иӡырган аконтинентқәа зегьы рҟынтәи 38тәылак инареиҳаны.

Ацәыргақәҵа асасцәа аԥсуа уаткеи аџьыкеи рыдыргалон. Аԥсуа традициатә культура аобиектқәа рыла ирԥшӡаз аԥсуа стенд Никарагуа атәылауааи асасцәеи аинтерес ду рызцәырнагеит.

Аԥснытәи аекспозициа иаҭааз асасцәа иреиуоуп Никарагуа акультура аминистр Рамон Родригес, Никарагуа ахада ицхырааҩ Камила Ортега, атуризм аминистр Мара Скотти, амилаҭтә медиа акоординатор Даниель Едмунд Ортега, Никарагуа иҟоу Урыстәыла ацҳаражәҳәаҩ Михаил Ледениов, Никарагуа иҟоу Венесуела ацҳаражәҳәаҩ Хавиер Арруа, иара убасгьы егьырҭ Никарагуа аккредитациа змоу Ацҳаражәҳәарҭақәа рхаҭарнакцәа.