Аахыҵ Уаԥстәыла Адәныҟатәи аусқәа рминистр Ахсар Џьиоев Аԥсны Адәныҟатәи аусқәа рминистр Олег Барцыц иира Амш идиныҳәалеит.

Адныҳәаларатә шәҟәаҿы иазгәаҭоуп:

«Шәара шәыԥсҭазааратәи шәзанааҭтәи мҩа – жәларбжьаратәи аилазаараҿы зҽаԥсазтәыз аҳаҭыр, апатуқәҵара иаша шәырҭеит. Шәтәыла ламысцқьала, гәык-ԥсыкала амаҵ аура шәшазыхиоу арҵабыргуеит.

Иахьагьы шәара ишәылоу аҟәыӷареи, иаашәырԥшуа ахықәкынагӡареи Аԥсны Аҳәынҭқарра адәныҟаполитикатә курс хра аманы анагӡара аус аҿы шьарда рыҵаркуеит.

Ҳаҭыр зқәу Олег Мсас-иԥа, шәара, Аахыҵ Уаԥстәылеи Аԥсни рыбжьара агәреибагаратә диалоги ганрацәалатәи аусеицуреи рырӷәӷәареи рырҿиареи рҿы хәы змаӡам хаҭалатәи алагала ҟашәҵоит. Агәра ганы сыҟоуп аҭоурыхтә лахьынҵақәа рзеиԥшра шьаҭас измоу ҳаинырра ӷәӷәеи наҟ-ааҟтәи ҳаицхыраареи аринахысгьы ҳажәларқәа рыбжьара аидгыларатәи аиашьаратәи еизыҟазаашьақәа рырҵаулара ишацхраауа».

Ахсар Џьиоев Олег Барцыц изеиӷьеишьеит агәабзиара, аманшәалара, аҳәынҭқарратә маҵзураҿы аринахысгьы ақәҿиарақәа.