Аԥсны Аҳәынҭқарра Адәныҟатәи аусқәа рминистр Олег Барцыц Аахыҵ Уаԥстәыла Адәныҟатәи аусқәа Рминистр Ахсар Џьиоев иира амш идиныҳәалеит.
Адныҳәаларатә шәҟәаҿы иазгәаҭоуп:
«Аԥсны Аҳәынҭқарраҟны шәара шәырдыруеит, аԥышәа ду змоу, хара ихәыцуа, ззанааҭтә ԥышәа беиоу, зус гәык-ԥсыкала иазыҟоу дипломатк иаҳасабала шәыхә ҳаракны иршьоит. Аахыҵ Уаԥстәыла Ареспублика адәныҟаполитикатә позициақәа рырӷәӷәареи уи жәларбжьаратәи аимадарақәа рырҿиареи рҿы шәлагала ҳаҭыр ду ақәуп.
Аԥсны Аҳәынҭқарреи Аахыҵ Уаԥстәыла Ареспубликеи реизыҟазаашьақәа традициала аиашьаратәи аидгыларатәи ҟазшьа рымоуп, ҳажәларқәа рлахьынҵа агәреибагареи, адгылареи, акзаареи шьаҭас ирымоуп. Агәра ганы сыҟоуп ҳаинырра ӷәӷәа аринахысгьы ҳастратегиатә партниорра арӷәӷәара ишазкхо.
Ҷыдала, агәыбылра аҵаны исгәаласыршәоит аҵыхәтәантәи ҳаиԥылареи Цхинвал аԥсуа делегациа гәаартыла ирзыҟаҵаз аиашьаратә дкылареи. Иаашәырԥшыз азҿлымҳареи гәыкалатәи асасдкылареи ҳажәларқәа рыбжьара ишьақәгылаз аизыҟазаашьақәа рыӷәӷәара даҽазныкгьы изырҵабыргуа акәны иҟалеит"»
Олег Барцыц Ахсар Џьиоев изеиӷьеишьеит агәабзиара, аманшәалара, иара убас иазԥхьагәеиҭоу ипланқәа зегьы — аҭакԥхықәра зцу аҳәынҭқарратә усураҿы еиԥш, ихатә ԥсҭазаараҿгьы қәҿиарала рынагӡара.