Даур Ақаҩба, Аԥсны Адәныҟатәи аусқәа рминистр адашшыларатә шәҟәы изишьҭит Урыстәыла Афедерациа Адәныҟатәи аусқәа рминистр Сергеи Лавров, иааиԥмырҟьаӡакәа Урыстәыла Афедерациа Ахаҭарнакс ООН иҟаз Витали Чуркин иԥсҭазаара иалҵра инамаданы.

Ашәҟәы аҟны иаҳәоит:

«Гәалсра дула исыдыскылеит урыстәылатәи адипломат ду Витали Чуркин иԥсҭазаара иалҵра. Витали Иван-иԥа иналукааша дипломатын, Урыстәыла амилаҭтә интересқәа рыхьчара дазыхиан. Аԥсны ахааназгьы ирхашҭраны иҟам Витали Иван-иԥа иқәгыларақәа, дымшәакәа иаартны аиаша иадгылара. Чуркин Урыстәыла адипломатиа аҭоурых дазаанхоит реиҳа узҿыԥшыша дипломатк иакәны.

Аҳәара ҟасҵоит Витали Иван-иԥа иуацәеи иҭынхацәеи сыхьӡала шәрыдашшыларц».