Аԥсны Аҳәынҭқарра Адәныҟатәи аусқәа рминистр Олег Барцыц аинформациатә маҵзура «Аԥсныпресс» аредактор хада Манана Гәыргәлиеи амаҵзура аколлективи аусбарҭа шьаҭаркуижьҭеи 31-шықәса аҵра рыдиныҳәалеит.

Адныҳәаларатә шәҟәы аҿы иазгәаҭоуп:

«Аинформациатә маҵзура «Аԥсныпресс» аԥҵан атәыла аекономикатәи аинформациатәи блокада аамҭа уадаҩ аан, ажьырныҳәа 31, 1995 шықәса рзы, Аԥсны Аҳәынҭқарра ахада Владислав Григори-иԥа Арӡынба Иусԥҟа инақәыршәаны.

Абарҭ аамҭақәа ирылагӡаны «Аԥсныпресс» ииашаҵәҟьаны Аԥсны Аҳәынҭқарра аинформациатә ҵакыраҿы иҷыдоу аҭыԥ ааннакылоит, Аԥсны Аҳәынҭқарра ауаажәларра-политикатә, асоциал-економикатә, акультуратә ԥсҭазаараҿы ихадоу ахҭысқәа еишьҭаргыланы, профессионалла иаазырԥшуа, атәыла аҩнуҵҟеиԥш уи анҭыҵгьы ииашоу, ианаамҭоу иҟаҵоу аинформациа ала инарҭбаау аудиториа еиқәнаршәоит».

Олег Барцыц Манана Гәыргәлиеи «Аԥсныпресс» аколлективи ирзеиӷьеишьеит арҿиаратә гәацԥыҳәара, ԥхьаҟатәи азанааҭтә қәҿиарақәа, аихьӡара ҿыцқәа.