Аԥсны Адәныҟатәи аусқәа рминистр Олег Барцыц Урыстәыла Адәныҟатәи аусқәа рминистр ихаҭыԥуаҩ Михаил Галузин иира амш идиныҳәалеит.

Адныҳәалараҿы иазгәаҭоуп:

"Ҩынҩажәа шықәса инареиҳаны шәара хацәынмырха, шәзанааҭдырра ҳарак аарԥшны, урыстәылатәи адипломатиа аус амаҵ азыжәуеит. Адипломатиатә миссиа аусзуҩ инаиркны аҷыдалкаатә зинмчы змоу Ацҳаражәҳәаҩи Урыстәылатәи Афедерациа Адәныҟатәи аусқәа рминистр ихаҭыԥуаҩи рҟынӡа амҩа шәахысны, адипломатиа аҟазара нагӡаны издыруа, аԥышәа змоу аҳәынҭқарратә усзуҩы ҳәа аҳаҭыр шәоуит. Шықәсырацәалатәи шәмаҵзура аҳәынҭқарратә ҳамҭа ҳаракқәа рыла иалкаауп, уи Урыстәылатәи Афедерациа адәныҟаполитикатә курс анагӡараҿы шәлагала ду арҵабыргуеит.

Аԥсны Аҳәынҭқарраҟны шәара шәырдыруеит ԥсахра зқәым ҩызак, гәыкала аԥсуа-аурыс еизыҟазаашьақәа рыҿиара иадгылаҩык иҳасабала. Ҩ-ганктәи амшхәаԥштә азҵаарақәа еснагь шәызхьаԥшра рымоуп, аԥсуа гани шәареи шәыбжьара иаарту, аконструктивтә диалог амҩаԥгара шәазыхиазаара ҳтәылаҿы ахә ҳаракны иршьоит. Агәра ганы сыҟоуп арегионалтә проблематика инарҵауланы адырра, апринципра, ԥсахрада гәаартыла азнеира аринахысгьы Аԥсни Урыстәылеи реизыҟазаашьақәа реидгыларатәи риашьаратәи ҟазшьа арӷәӷәара ишацхраауа".

Олег Барцыц Михаил Галузин изеиӷьеишьеит агәабзиара, аманшәалара, аҭакзыԥхықәу аҳәынҭқарратә усураҿы ақәҿиара ҿыцқәа.