Рашәарамза 16 рзы Аԥсны Адәныҟатәи аусқәа рминистр Олег Барцыц Ростов-на-Дону иҟоу Аԥсны аҳаҭыртә консул Адик Аршба диԥылеит.
Аиԥылара иалахәын Аԥсны Адәныҟатәи аусқәа рминистр ихаҭыԥуаҩ Одиссеи Бигәаа, аминистр ицхырааҩ Дмитри Амҷба, аминистрра аппарат анапхгаҩы ихаҭыԥуаҩ Алиса Барзаниаԥҳа.
Аиԥылара аҳәаақәа ирҭагӡаны аминистрра ахада Олег Барцыц иазгәеиҭеит Ростов-на-Дону иҟоу Аԥсны аҳаҭыртә консулреи дареи русуратә еимадарақәа еснагь ишыҟоу, ринтенсивра шыҳараку.
"Иҭабуп ҳәа шәасҳәар сҭахуп шәус анагӡареи аоперативреи рзы. Ҳара еснагь иаадыруеит Ростовтәи аобласти ҳареи иҳараку аҩаӡаралатәи ҳаинырра ацҵаразы аҵак ду змоу ахҭысқәеи аусуратә ҷыдарақәеи зегьы, аинырраҿы ицәырҵуа азҵаарақәа зегьы, ҳтәылауаа рзы акрызҵазкуа атемақәагьы налаҵаны, иааиԥмырҟьаӡакәа аус шрыдуло, хшыҩзышьҭра шрыҭо», — иҳәеит иара.
Олег Барцыц хазы иҭабуп ҳәа иеиҳәеит Адик Аршба Ростовтәи аԥсуа диаспореи иареи аимадара бзиа ахьрымоу азы, инаҵшьны иазгәеиҭеит адиаспора аҵакы шдуу, аҳаҭыр ду шамоу.
"Адиаспора напхгара аиҭоит Виктор Шамил-иԥа Ҳашба. Адәныҟатәи аусқәа рминистрраҟны дсыдыскылон. Даара хра злоу аиҿцәажәара ҳаман. Иара инагӡаны иаҳирдырит адиаспора аусура аспектрқәа зегьы, иара убас Аҳаҭыртә консулреи хаҭала шәареи аус шицыжәуа атәы», ҳәа инаҵшьны иазгәеиҭеит аминистр.
Адик Аршба иакәзар иазгәеиҭеит Ростов-на-Дону Аконсулра аусура мҩаԥысуеижьҭеи акраамҭа шыҵуа.
Иара иациҵеит азҿлымҳара цҵа зҭаху, хаз игоу аҭагылазаашьақәа ирыхьмырԥшыкәа ицәырҵуа азҵаарақәа зегьы рзы зыԥшра ҟамҵакәа оперативла иахәҭоу ауснагӡатәқәа шрыдыркыло.
"Ҳара ианаамҭоу, шәара шәнапынҵала, иахәҭоу ашьаҿақәа зегьы рыҟаҵара ҳҽазаҳшәоит. Сгәы излаанаго ала, уи алҳаршоит. Зны-зынла, ҳәарада, АИХқәа ринформациа азымхоушәа убоит. Аха шәинтервиу (АГТРК) аҿы ииашаны ишазгәашәҭаз ала, Адәныҟатәи аусқәа рминистрра аусура зегьыҵәҟьа ирбарҭан иҟамзароуп», ҳәа азгәеиҭеит иара.
Ростовтәи аԥсуа диаспореи иареи реимадара далацәажәо иара инаҵшьны иазгәеиҭеит аҵыхәтәантәи ашықәсқәа рзы русеицура қәҿиарала аҿиара ишаҿу, еиҳа-еиҳа активра шаиуа.
«Ҳтәылауаа адгылара рыҭареи рыхьчареи, аҵареи, аекономикатә партниорреи, иара убас аусутә еимадарақәа русхк аҟны ицәырҵуа атемақәеи ирызку азҵаарақәа — арҭ ахырхарҭақәа зегьы оперативла рыӡбара ҳҽазаҳшәоит", ҳәа азгәеиҭеит иара.
Аиҿцәажәараан, Ростовтәи аобласт аҿы инхо, аҵара зҵо Аԥсны Аҳәынҭқарра атәылауаа рхыԥхьаӡара акыр ҳасаб азуны, аконсултәи азинтәи цхыраара рыҭара амеханизмқәа аринахысгьы реиӷьтәра аҵак ду шамоу азгәаҭан. Абри аконтекст аҿы аганқәа Аԥсны Аҳәынҭқарра атәылауаа аконсултә хьчара рыҭара алыршара иадҳәалоу азҵаарақәа ирзааҭгылеит, Аԥсны Аҳәынҭқарра атәылауаҩ И.Бжьинаа идҳәалоу азҵаарақәагьы налаҵаны.
Адик Аршба иара убасгьы Олег Барцыц иҭабуп ҳәа иеиҳәеит Ростовтәи аобласт аҿы имҩаԥиго аусура дахьазҿлымҳау азы, инаҵшьны иазгәеиҭеит Адәныҟатәи аусқәа рминистрра анапхгареи аусзуҩцәеи иааиԥмырҟьаӡакәа реимадара аусеицура арӷәӷәара ишацхраауа.
Аиԥылара аихшьаалақәа рыла наҟ-ааҟ азҿлымҳара змоу ахырхарҭақәа зегьы рыла анаҩстәи аинырра ишазыхиоу шьақәырӷәӷәан.
