Аԥсны Адәныҟатәи аусқәа рминистр Олег Барцыц Приднестровиатәи Молдавиатәи Ареспублика Адәныҟатәи аусқәа рминистр Витали Игнатиев адныҳәаларатә нота изишьҭит Приднестровиатәи Молдавиатәи Ареспублика Адәныҟатәи аусқәа рминистрра аԥҵара Амш инамаданы.

Анотаҿы иазгәаҭоуп:

"1992 шықәсазы иаԥҵаз Приднестровиатәи Молдавиатәи Ареспублика Адәныҟатәи аусқәа рминистрра ашьақәгылареи аҿиареи рымҩа ду ианысит, ихадоу аҳәынҭқарратә институтқәа ируакхеит. Хыԥхьаӡара рацәала ауадаҩрақәа — жәларбжьаратәи аҭахкаара, ааигәа-сигәа иҟоу атәылақәа рганахьала ашәарҭарақәа, аекономикатәи агуманитартәи блокада шыҟоугьы, - приднестровиатәи адипломатиа ԥсахрада иаанарԥшуеит Приднестровие ажәлар рзы ихьыԥшым, исуверентәу аҳәынҭқарра аидеиа хьаҵра зқәым акәны адгылара шамоу.

Еишьҭаргыланы, хьаҳәхьачарада жәларбжьаратәи апозициақәа рӷәӷәо, Приднестровиатәи Молдавиатәи Ареспублика адәныҟаполитикатә усбарҭа ԥсахрада аҽазнашәоит иҟоу аилибамкаарақәеи аимак-аиҿакқәеи ҭынчмҩала рҭышәныртәалара аҽазышәара, убри аан амилаҭтә интересқәа ӷәӷәала ирыдгылоит.

Аԥсны Адәныҟатәи аусқәа рминистрра ахә ҳаракны иашьоит аиашьареи, аидгылареи, агәреибагареи, апатуеиқәҵареи рдоуҳала иҿио ҳҳәынҭқаррақәеи ҳадәныҟаполитикатә усбарҭақәеи еидызҳәало традициала аиҩызаратә еизыҟазаашьақәа. Агәра ганы сыҟоуп ҳтәылақәа рыбжьара иҟоу аимадарақәа анаҩстәи реизырҳареи рырҵаулареи аринахысгьы аинырра иахырхарҭа хаданы ишаанхо, ҩ-республикак рыжәларқәа реизҳазыӷьаразы алҵшәақәа шааргало».

Олег Барцыц Приднестровиатәи Молдавиатәи Ареспублика Адәныҟатәи аусқәа рминистрра аколлектив ирзеиӷьеишьеит агәабзиара, аманшәалара, атәыла аизҳазыӷьаразы аҭакзыԥхықәу рзанааҭтә усураҿы аихьӡара ҿыцқәа.