Аԥсны Аҳәынҭқарра адәныҟатәи аусқәа рминистр Олег Барцыц Приднестровие Молдавиатәи Ареспублика адәныҟатәи аусқәа рминистр Витали Игнатиев иирамш идиныҳәалеит.

Адныҳәалараҿы иазгәаҭоуп:

“Аԥсни Приднестровиеи акыр шықәса зхыҵуа аиҩызаратә еизыҟазаашьақәеи аицхыраареи еидырҳәалоит. 1993 шықәсазы раԥхьатәи аиҩызареи аусеицуреи рзы Аиқәшаҳаҭра анапаҵыҩра инаркны ҳҳәынҭқаррақәа рыжәҩа еибыҭаны аус руеит, аполитика, аекономика, агуманитартә усхкқәа рҿы реимадара дырӷәӷәоит.

Шәзанааҭдырра ҳараки ҳҳәынҭқаррақәа рыбжьара аиҿцәажәара аҿиараҿы шәлагала дуи рыхә ҳаракны иаҳшьоит. Иуадаҩу адәныҟатәи ирыхьмырԥшыкәа, ҳусбарҭақәа аконструктивтә еимадара рыбжьоуп, уи еиҳарак иахьатәи аҭагылазаашьақәа рҿы акырӡа аҵанакуеит.

Ари амш аҽны ишәзеиӷьасшьоит агәабзиара, аизҳазыӷьара, аҭакԥхықәра ду зцу шәусураҿы ақәҿиарақәа. Аԥсни Приднестровиеи ирықәынхо ажәларқәа рыбзазаразы ҳаизыҟазаашьақәа аринахысгьы иҿиалааит”.