Аԥсны Аҳәынҭқарра Адәныҟатәи аусқәа рминистр Олег Барцыц, Британиа Ду Аԥсны аҳаҭыр змоу аконсул, британиатәи аҵарауаҩ - кавказҭҵааҩ, "Ахьӡ –Аԥша" аорден аҩбатәи аҩаӡара занашьоу Џьорџь Хьиуитт иԥшәма Заира Хьиԥҳа лыԥсҭазаара дахьалҵыз инамаданы дидашшылеит.

Адашшылараҿы иазгәаҭоуп:

«Аԥсны Аҳәынҭқарра Адәныҟатәи аусқәа рминистрреи хаҭала сареи ҳахьӡала шәыԥшәма Заира Хьиԥҳа лыԥсҭазаара дахьалҵыз азы гәалсра дула сшәыдашшылоит.

Аԥсны Аҳәынҭқарраҿы ахә ҳаракны иршьоит Шәҭаацәеи, хаҭала шәареи атәыла акультуреи аҭоурыхи аҳәаанырцә аларҵәара иазырхоу шәусура ду, шәџьабаа.

Заира Хьиԥҳа шәҩыза иаша лакәын, дарӷьажәҩаны дшәывагылан.

Иуызгәакьоу ауаҩы иҟамзаара еиқәтәашьа змам хьаауп. Абри иуадаҩу аамҭазы харҭәаашьа змам шәцәыӡ ахьаа шәыцеиҩаҳшоит, ишәзеиӷьаҳшьоит агәыӷәӷәара.

Заира Хьиԥҳа лгәалашәара дыздыруаз, бзиа дызбоз зегьы рыгәқәа рҿы ахаангьы иҟазаауеит».