Адәныҟатәи аусқәа рминистр инапынҵақәа назыгӡо Сергеи Шамба Приднестровиатәи иколлега Витали Игнатиев Аԥсны Аҳәынҭқарреи Приднестровиатәи Молдавиатәи Ареспубликеи рыбжьара аиҩызареи аусеицуреи рзы Аиқәшаҳаҭра анапаҵыҩра 32 шықәса ахыҵра инамаданы адныҳәаларатә шәҟәы изишьҭит.
Адныҳәалараҿы хаҭала иазгәаҭоуп:
«1992-1993 шш. раантәи Аԥсны жәлар Рџьынџьтәылатә еибашьраан анапы зҵаҩыз раԥхьатәи Жәларбжьаратәи аиқәшаҳаҭра ҳтәылақәа рыбжьара ҩ-ганктәи аҿиара ҵаҵӷәы ӷәӷәаны иазыҟалеит, аиҩызареи агәреибагареи ирышьагәыҭхеит.
Аиқәшаҳаҭра анапаҵаҩра иалнаршеит еиуеиԥшым ахырхарҭақәа ирыҵанакуа жәабала аусбарҭабжьаратә еиқәшаҳаҭрақәа рыбжьаҵара, урҭ рыбзоурала Аԥсны Аҳәынҭқарреи Приднестровиатәи Молдавиатәи Ареспубликеи реизыҟазаашьақәа аиҩызара ӷәӷәа шьаҭас измоу, агәазыҳәарақәа ҳасаб рзызуа, агәаартреи агәреибагареи рыпринципқәа иреиҳаӡоу рыҩаӡара аҟынӡа инеиит.
Ҷыдала иазгәасҭар сҭахуп асистематә ҟазшьа змоу аусбарҭабжьаратә еинырра аҩаӡара ҳаракы.
Агәрагара сымоуп Аԥсни Приднестровиеи рыжәларқәа реизҳазыӷьара ахьӡала наҟ-ааҟгьы аинтерес зызрымоу ахырхарҭақәа зегь рҟны аҳәынҭқаррабжьаратә еизыҟазаашьақәа рыҿиара ԥхьаҟагьы ишацырҵало».