Аԥсны Аҳәынҭқарра адәныҟатәи аусқәа рминистр инапынҵақәа назыгӡо Иракли Ҭыжәба Аԥсны аԥыза-министр ихаҭыԥуаҩ, аҩныҵҟатәи аусқәа рминистр, амилициа аинрал-маиор Роберт Кьиут азанааҭтә ныҳәа – Аԥсны Аҳәынҭқарра аҩныҵҟатәи аусқәа русбарҭақәа раԥҵара Амш инамаданы адныҳәаларатә шәҟәы изишьҭит.
Адныҳәалараҿы иазгәаҭоуп:
«Амилициа изанааҭ реиҳа иуадаҩу, аҭакԥхықәра зду занааҭуп. 1992-1993 шықәсқәа рзтәи Аԥсны Жәлар Рџьынџьтәылатә еибашьраан амилициа аусзуҩцәа гәымшәарыла рыԥсадгьыл рыхьчон, урҭ рҟынтәи жәҩык Аԥсны Афырхаҵа ҳәа аҳаҭыртә хьӡы ранашьоуп. Иахьагьы Аԥсны АҩАР аусзуҩцәа атәыла азинеиҿкаара рыхьчоит.
Ари аныҳәатә мшы аҽны, хаҭала сареи Аԥсны Аҳәынҭқарра адәныҟатәи аусқәа Рминистрра аколлектив рыхьӡалеи Аԥсны аҩныҵҟатәи аусқәа рминистрра аилазаара зегьы ирзеиӷьасшьоит русураҿы ақәҿиарақәа, аизҳазыӷьара, аҭынч жәҩан!»