Аԥсны Аҳәынҭқарра адәныҟатәи аусқәа рминистр ихаҭыԥуаҩ Одиссеи Бигәаа напхгара зиҭоз Аԥсны Аҳәынҭқарра адәныҟатәи аусқәа Рминистрра аколлектив, Аԥсны Аҳәынҭқарраҿы иҟаз аҷыдалкаатә зинмчы змоу Аахыҵ Уаԥстәыла ацҳаражәҳәаҩ Олег Илиа-иԥа Боциев наӡаӡа абзиараз ҳәа иаҳәара ацеремониа рхы аладырхәит.

Адәныҟатәи аусқәа Рминистрра анапхгареи аколлективи рыхьӡала Одиссеи Бигәаа Олег Илиа-иԥа иҭаацәеи иҭынхацәеи дрыдашшылеит.

Аԥсыжратә усмҩаԥгатә аҿы ажәахә ҟаҵо, адәныҟатәи аусқәа рминистр ихаҭыԥуаҩ иазгәеиҭеит "Олег Илиа-иԥа дуаҩыҵәҟьан, изанааҭ идыруан, иԥсҭазаара зегьы хамеигӡарада иус иазкын. Ҳажәларқәа рыбжьара ԥгара зқәым аиҩызареи аиашьареи рырӷәӷәаразы ҿырԥшыс дыҟан.

Олег Илиа-иԥа Аахыҵ Уаԥстәылеи Аԥсни ринтересқәеи ршәарҭадареи рыхьчара ихы-иԥсы зегьы азикит, ари азеиԥш ус аҿы иҟаиҵаз алагала ахә ашьара залшом" ҳәа.

Одиссеи Бигәаа иазгәеиҭеит "Олег Илиа-иԥа ҳгәалашәараҿы наунагӡа даанхоит иҟәышыз, аџьа бзиа избоз, апринципқәа змаз, ииашоу профессионалк иҳасаб ала" ҳәа.