Еиду амилиҭқәа реиҿкаара Ашәарҭадаратә Хеилак алахәылацәа – Франциа, Иапониа, Мальта, Словениа, Британиа Ду, Еиду аштатқәа, иара убасгьы ԥхьаҟа уи иалахәылахараны иҟоу – Даниа, Бырзентәыла рыхьӡала Мальта еснагьтәи ахаҭарнак ихаҭыԥуаҩ Франчески Гатт иҳәамҭа ҳазыӡырҩит. Аҳәамҭаҿы иазгәаҭоуп Аԥсны Аҳәынҭқарреи Аахыҵ Уаԥстәылатәи Ареспубликеи «Қырҭтәыла иузаҟәымыҭхо хәҭоуп» ҳәа, иара убасгьы ааԥхьара ҟаҵоуп Урыстәылахь арҭ аҳәынҭқаррақәа рхьыԥшымра мап ацәнакырц.

«Қырҭтәыла аҵакыратә акзаара» ҳәа аамҭа-аамҭала еиҭарҳәало ажәа шаблонқәа иаадырԥшуеит жәларбжьаратәи аилазаара ахаҭарнакцәақәак Кавказ анҭыҵ иҟоу аҭагылазаашьа иашаҵәҟьа обиективла ишрызрыдымкыло, шаҳаҭрагьы ауеит ари арегион аҿы ицо апроцессқәа рҭышәныртәалара азҵаарақәа ишырцәыхаро.

Абри инадҳәаланы ишәгәалаҳаршәоит Аԥсны Аҳәынҭқарра исуверентәу ҳәынҭқарраны ишыҟоу, аҳәынҭқарра амазаарагьы акыр шәышықәса ишырҭысуа. Аԥсуа жәлар ақырҭуа колониализм иаҿагыланы рықәԥареи ақырҭуа агрессиа иаҿагыланы рхақәиҭреи рхьыԥшымреи рзы азакәаншьаҭа змоу рзин ахьырыхьчази ЕАР Аԥҟаԥҵәа апринцип хадақәа ирықәшәоит.

Ҳгәы ацәыхьшәашәаны иаҳҳәоит жәларбжьаратәи аилазаара ахаҭарнакцәақәак жәларбжьаратәи азин апринцип хадақәа дара ринтересқәа ишрыдырҳәало.

Инаҵшьны иазгәаҳҭоит Аԥсны иқәынхо ажәлар ахьыԥшымраз рҭахрақәа 1999 шықәса жьҭаара 3 азы ареферендум амҩала ишазхарҵаз 1994 шықәсазы ирыдыркылаз Аконституциаҿы Аԥсны Аҳәынҭқарра исуверентәу, идемократиатәу, изинтәу ҳәынҭқарроуп ҳәа иарбаз аилкаара. Жьҭаара 12 1999 шықәсазы ареферендум аихшьаалақәа шьаҭас иҟаҵаны Аԥсны жәлар Реизара-Апарламент иаднакылеит Аԥсны Аҳәынҭқарра ахьыԥшымразы Ашәҟәынҵа.

Аҽазныкгьы жәларбжьаратәи аилазаарахь ааԥхьара ҟаҳҵоит арегион аҿы иҟоу аҭагылазаашьа обиективла ирыдыркыларц.

Ааԥхьара ҟаҳҵоит жәларбжьаратәи азин апринципқәеи анормақәеи инарықәыршәаны Аԥсны ажәлар ргәаҳәара азхарҵарц, иазхарҵарц Кавказ анҭыҵ ишьақәгылаз аполитикатә реалиақәа, зыҟны Аԥсны Аҳәынҭқарра ихьыԥшым ҳәынҭқарраны ишьақәгылоу.