2025 шықәса цәыббрамза 26 рзы Аԥсны Аҳәынҭқарра адәныҟатәи аусқәа рминистр Олег Барцыц, Аҟәа ақалақь, Ражьден Гәымба ихьӡ зху Аԥсуа ҳәынҭқарратә филармониаҿы имҩаԥысуаз Афедералтә ҵарадырратә марафон "Адырра. Аԥхьагылаҩцәа" аартраан дықәгылеит.

Аԥсны Аҳәынҭқарра ахада Бадра Гәынбеи Аԥсны Аҳәынҭқарра аҵарадырра аминистр Хана Гәынбеи ажәахәқәа ҟарҵеит.

Аԥсны Аҳәынҭқарра адәныҟатәи аусқәа рминистр Олег Барцыц иажәахә аҿы Урыстәылатәи Афедерациа анҭыҵ, Аԥсны Аҳәынҭқарраҿы имҩаԥысуа аҵаралашаратә марафон "Адырра. Аԥхьагылаҩцәа" аиҿкааҩцәеи алахәылацәеи ҭабуп ҳәа реиҳәеит.
Уи инаҵшьны иазгәеиҭеит ас еиԥш амҽхак ду змоу, зидеиақәеи зхықәкқәеи ԥхьаҟатәи аԥеиԥш иазырхоу ауснагӡатә, ҭынчмҩала аҿиара амҩа иану, зых иақәиҭу, исуверентәу Аԥсны Аҳәынҭқарраҿы аартра асимволизм ҵаула шамоу.

«Ҳара аҭынчратә планқәа ҟаҳҵоит, зегь реиҳа ихадоу ҳрылацәажәоит: ԥхьаҟатәи аԥеиԥш ахь аинвестициақәа ралагалара ртәы ҳҳәоит, интеллектуалтә инвестициақәа рыӡбахә ҳамоуп. Ҳрылацәажәоит иарбанзаалак атәыла аҿиараҿы ихаданы ишьоу аҵарадырра, уи ԥхьаҟа еихазҳауа аҿар.

Ҳаамҭазтәи, адинамикатә ҟазшьа змоу, ирласны аҿиара зауа, зҽызыԥсахуа адунеи аҿы ари зегьы ирыцкуп. Адырра шәымазар, ирласны зҽеиҭазкуа, ирласны ԥхьаҟа ицо, акомпетенциа ҳарак змоу ари адунеи аҿы дарбанызаалак иацлабра шәылшоит. Арҭ сажәақәа зызку иахьа абра еизаз ҳтәылауаа қәыԥшцәеи ҳасасцәеи шәоуп", ҳәа иазгәеиҭеит иара.

Олег Барцыц Аԥсны Аҳәынҭқарреи Урыстәылатәи Афедерациеи рыбжьара ибеиоу аусеицуреи апартниорреи рспектргьы далацәажәеит. Ҷыдала, аҵарадырраҿы реинырра дазааҭгылеит, ари ахырхарҭаҿы акыр зхыҵуа атрадициа бзиақәа шьақәгыланы ишыҟоу инаҵшьны иазгәеиҭеит. Иара убасгьы иазгәеиҭеит иахьа уажәазы аҩ-ҳәынҭқаррак рыбжьара ишьақәыргылоу, иҳараку астандартқәа аҩганк рырбеиареи рԥышәа аимдареи рзы хра шрылоу.

Олег Барцыц иқәгылараҿы ҷыдала дазааҭгылеит Аԥсны Аҳәынҭқарреи Урыстәылатәи Афедерациеи русеицураз акыр зҵазкуа акомпонент – арратә усхк аҿы аусеицура.

«Имаӡаӡам Аԥсны Аҳәынҭқарреи мрагыларахьтәи ҳгәылацәеи рыбжьара амч ахархәара мап ацәкразы макьана аиқәшаҳаҭра шыҟам. Қырҭтәыла анапхгара агәымбылџьбарара аарԥшны, системала, изныкымкәа азакәаншьаҭа змоу аиқәшаҳаҭра анапаҵыҩра мап ацәыркхьеит. Женеватәи аилацәажәарақәа анаҩстәи рраунд абҵарамзазы имҩаԥысраны иҟоуп, уа ҳара даҽазныкгьы ишьақәҳарӷәӷәоит арратә мчхара ахархәара мап ацәкразы аиқәшаҳаҭра анапаҵыҩра шхымԥадатәиу» ҳәа иҳәеит иара.

Уи, иара убас, Урыстәылатәи Афедерациа адәныҟаполитикатә усуреи Аԥсны Аҳәынҭқарра адәныҟаполитикатә усуреи реишьаршәалара атәы далацәажәеит, иҳәеит урыстәылатәи адипломатиа иҟанаҵо адгылара атәы.