Цәыббра 7 азы Аԥснытәи аҳәынҭқарратә университет аректор, афизика-математикатә наукақәа рдоктор, академик Алеко Гәарамиа ииубилеи азгәеиҭоит.

Приднестровиатәи Молдавиатәи Ареспубликаҿы иҟоу азинмчнаӡа змоу Аԥсны Аҳәынҭқарра ахаҭарнак Александр Ватаман ҭелла реицәажәараан аиубилиар имшира идиныҳәалеит.

Адипломат иазгәеиҭеит, аҵарауаҩ амҽхак ду змоу ибаҩхатәра, ирҿиаратә мчы, уамашәа иубаша игәцаракра алшара ширҭо иахьа еиҵагыло абиԥара идырреи иԥышәеи рыцеиҩшараз, Аԥсны азы акадр ҿыцқәа, апатриотцәа реиҵааӡараан иҿырԥшы шьарда шамчу.

Александр Ватаман иазгәеиҭеит Алеко Гәарамиа «Аԥсны-Приднестровиатәи аизыҟазаашьақәа рыҿиара иалахәра ауниверситетқәа рыбжьара аусеицура мацара адагьы аҳәынҭқаррабжьаратә еизыҟазаашьақәа рыхкқәа рацәаны ишаҵанакуа». Уи азы Александр Ватаман Аԥснытәи ауниверситет аректор ҷыдала ҭабуп ҳәа иеиҳәеит.

Адипломат, аиубилиар изеиӷьеишьеит агәабзиара, агәалаҟара, инымҵәаӡо амч-лшара.