Аԥсны Аҳәынҭқарра адәныҟатәи аусқәа рминистр Олег Барцыц афилологиатә наукақәа рдоктор, Аԥснытәи аҳәынҭқарратә университет апрофессор Екатерина Бебиаԥҳа лымшира лыдиныҳәалеит.

Адныҳәаларатә шәҟәаҿы иазгәаҭоуп:

«Шәара шәыԥсҭазааратә мҩа шәыжәлари шәыԥсадгьыли гәык-ԥсык ала рымаҵ аура иаҿырԥшыган иҟоуп.
Шәара журналистк, шәҟәыҩҩык, публицистк, ҵарауаҩык иаҳасаб ала Аԥсны Аҳәынҭқарраҿеиԥш, уи анҭыҵгьы шәырдыруеит.

1992–1993 шықәсқәа рзтәи Аԥсны жәлар Рџьынџьтәылатә еибашьраан Аԥсны Аҳәынҭқарра атәылахьчара Аминистрра арратә корреспондентс шәыҟан. 1941–1945 шықәсқәа рзтәи Аџьынџьтәылатә еибашьра Дуӡӡа аветеранцәа, арепрессиа зызуыз ҳауаажәлар рхаҭарнакцәа, 1992–1993 шықәсқәа рзтәи Аԥсны жәлар Рџьынџьтәылатә еибашьраан Аԥсадгьыл ахьчаҩцәа уҳәа убас егьырҭгьы ирызку шәҩымҭақәа ҳаамҭазтәи аԥсуа литературеи ажурналистикеи рыхьтәы фонд иеиуоуп.

Амилаҭтә журналистцәа разыҟаҵараҿы, шәдырреи шәԥышәеи еиҵагыло абиԥара рызнагараҿы иҟашәҵо алагала акәзар, иахәҭоу ахәшьара аҭара залшом.

Ҳаҭыр зқәу Екатерина Гьаргь-иԥҳа, ишәзеиӷьасшьоит агәабзиара, анасыԥ, шәусқәа зегьы рҿы ақәҿиарақәа».