Аԥсни Урыстәылеи рыдәныҟаполитикатә усбарҭақәа рминистрцәа Олег Барцыци Сергеи Лаврови реиԥылара жьҭаарамза 1 азы Шәача ақалақь аҿы имҩаԥысраны иҟоуп.

Аԥсны адәныҟатәи аусқәа рминистр Олег Барцыци Урыстәыла адәныҟатәи аусқәа рминистр Сергеи Лаврови ҩ-ганктәии арегионалтәии усеицураҿ ихадоу азҵаарақәа рганахь ала «аамҭа еиҿдырԥшуеит». 

Аиԥылара аҳәаақәа ирҭагӡаны 2026-2027 шықәсқәа рзы аҩ-ҳәынҭқаррак рдәныҟаполитикатә усбарҭақәа рыбжьара Аконсультациақәа рыплан анапаҵаҩра азыԥхьагәаҭоуп.

Иара убас, жьҭаара 1 аҽны Аахыҵ Уаԥстәыла адәныҟатәи аусқәа рминистр Ахсар Џьиоев далахәны х-ганктәи аиԥыларагьы мҩаԥгахоит. Аԥсны адәныҟатәи аусқәа рминистр Олег Барцыци, Урыстәыла адәныҟатәи аусқәа рминистр Сергеи Лаврови, Аахыҵ Уаԥстәыла адәныҟатәи аусқәа рминистр Ахсар Џьиоев Аахыҵ Кавказ ашәарҭадареи аҭышәынтәалареи рзы жәларбжьаратәи аиҿцәажәарақәа ирыдҳәалоу азҵаарақәа ирылацәажәоит.