Нанҳәа 14 рзы Аԥсны адәныҟатәи аусқәа рминистр ихаҭыԥуаҩ Одиссеи Бигәааи Аахыҵ Уаԥстәыла иҟоу аҷыдалкаатә зинмчы змоу Аԥсны Аҳәынҭқарра ацҳаражәҳәаҩ Алан Елбакиеви ҭелла еицәажәеит.
Аицәажәараан, ақырҭуа агрессор иҿагылараҿы ахақәиҭреи ахьыԥшымреи рзы зҭоурыхтә зин зыхьчоз Аԥсни Аахыҵ Уаԥстәылеи рыжәларқәа риашьара еилшәара шамоуа азгәаҭан.
Алан Елбакиев Аахыҵ Уаԥстәыла иҟоу Аԥсны Ацҳаражәҳәарҭа аусура шымҩаԥысуазы Одиссеи Бигәаа адырра ииҭеит, Аԥсни Аахыҵ Уаԥстәылеи риашьаратә еизыҟазаашьақәа рыҿиареи рырӷәӷәареи рҵак ду азгәеиҭеит.
Алан Елбакиев иҳәеит, 1992-1993 шықәсқәа рзтәи Аԥсны жәлар Рџьынџьтәылатә еибашьра ианалагаз, нанҳәа 14 аҽны инақәыршәаны, Цхинвал, Иԥшьоу Анцәа иан Мариеи Иԥшьоу Ахҿи руахәамаҿы иҭахаз аибашьцәеи аҭынч уааԥсыреи рзы аныҳәарақәа мҩаԥысит ҳәа. Ауснагӡатә далахәын Уаԥстәыла адәныҟатәи аусқәа рминистр Ахсар Џьиоев.