Шьамтәылатәи Арабтә Республика инхо ачерқьес диаспора аҟынтәи гәыԥҩык астудентцәа Аԥснытәи аҳәынҭқарратә университет ахь аҵара рҵарц иаауеит.
Москва, 9-ҩык рыла ишьақәгылоу астудентцәа ргәыԥ Урыстәылатәи Афедерациаҿы иҟоу Аԥсны Аҳәынҭқарра Ацҳаражәҳәарҭа адипломатцәа рԥылеит.
Урыстәыла иҟоу Аԥсны Ацҳаражәҳәарҭа аусзуҩцәа Ԥачугә Чыкәбари Станислав Каџьаиеи ҭабуп ҳәа раҳәоуп Аԥсни Шьамтәылеи реизыҟазаашьақәа рыҿиараҿы иҟарҵаз ацхырааразы, ҷыдала – Москва астудентцәа рделегациа аԥылараҿы, азҿлымҳара аарԥшраҿы. Абри аганахь ала Адҵа инапы аҵаиҩит Аԥсны Аҳәынҭқарра адәныҟатәи аусқәа рминистр Сергеи Шамба.