Жьҭаара 24 рзы Аԥсны иҟоу Никарагуа ҳаҭыр зқәу Аконсулраҿы ҳаҭыр зқәу аконсул Алиас Ҳашба Никарагуатәи Афонд «Инканто» (Никарагуатәи авокалтә институт) ахапанагӡаҩ хада, Алиса Гыцба имҩаԥылго Жәларбжьаратәи амузыкатә еицлабраҿы "Амузыка – дгьыли ҳәааи зыбжьам адиалог" аҟны аԥхьахәқәа ҩба занашьахаз Катерина Веласкес дылԥылеит.
Аиԥылара лхы алалырхәит Аԥсны Аҳәынҭқарра адәныҟатәи аусқәа Рминистрраҿы Латинтәи Америка, Азиа, Азиа-Аокеан Ҭынч арегион Рдепартамент анапхгаҩы Мадина Зыхәба.
Алиас Ҳашба Катерина Веласкес аицлабраҿы илоуз аԥхьахәқәа лыдиныҳәалеит, лҟазаратә усқәа рҿы ақәҿиарақәа лзеиӷьеишьеит. Ҳаҭыр зқәу аконсул Аконсулра аусура, ҷыдала акультуратә усмҩаԥгатәқәа ртәы далацәажәеит.
Мадина Зыхәба иазгәалҭеит, Урыстәылатәи Афедерациа акультуратә ԥшьгамҭақәа рзы аҳәынҭқарра ахада ифонди, иара убас, Аԥсны Аҳәынҭқарра аиҳабыреи анапхгареи рыцхыраарала имҩаԥысуа аицлабра ҳҳәынҭқаррақәа рыбжьара акультурабжьаратә диалоги аусеицуреи аринахысгьы рырӷәӷәаразы акырӡа аҵанакуеит ҳәа.
Адипломат илгәалалыршәеит Аԥсны адәныҟатәи аусқәа рминистр Олег Барцыц напхгара зиҭоз Аԥсны Аҳәынҭқарра аделегациа ҳазҭоу ашықәс ԥхынгәымзазы Ареспублика Никарагуа раҭаараан, Никарагуа анапхгареи дареи имҩаԥыргаз аиԥыларақәа рҟны Никарагуа ахада иабжьгаҩ Лауреано Ортега Аԥсни Никарагуеи русеицура ииашоу ҵакыла арҭәра хымԥадатәиуп, агуманитартә усеицура арҭбаарагьы хра амоуп ҳәа шиҳәаз.
Иахьа ҳара даара ҳаигәырӷьоит ҳҳәынҭқаррақәа рыбжьара акультуратә еизыҟазаашьақәа рыҿиара иадҳәаланы иҳабжьаҳҵаз аиқәшаҳаҭрақәа рынагӡашьа ҳәа азгәалҭеит Мадина Зыхәба.
Мадина Зыхәба агәра ганы дыҟоуп, аҳәынҭқаррабжьаратә усеицура еиҳагьы изырӷәӷәаша аԥшьгамҭақәеи апроектқәеи ԥхьаҟа ишышьҭоу.
Катерин Веласкес лакәзар, Аԥсны илзаадырԥшыз адкылара ҟәандазы ҭабуп ҳәа ралҳәеит. Лара иазгәалҭеит "аҳәынҭқаррақәа рнапхгара рыбжьара аҳаҭыр ду шыҟоу, аусеицуреи, абизнеси, аекономикеи рҿы аизыҟазаашьақәа рыҿиаразы агәазыҳәара шдуу. Аха акультура аганахьала аизыҟазаашьақәа сара сзы еиҳарак хәызмоу ракәны иҟоуп, избанзар акультура еснагь аполитика аасҭа иҳаракуп – уи уеизааигәанатәуеит. Сара сзы игәахәара дууп ари аус сахьахәҭаку" ҳәа.