Аԥсны Аҳәынҭқарра адәныҟатәи аусқәа рминистр Олег Барцыц Жәларбжьаратәи адокументалтә кино афестиваль "RТ. Док: Ҳфырхацәа раамҭа" аартра ацеремониаан ажәахә ҟаиҵеит.
(Аԥснытәи Аҳәынҭқарратә университет, 2025 шықәса, абҵарамза 17)
Ҳаҭыр зқәу Аҳәынҭқарра Ахада, ҳаҭыр зқәу акинофестиваль "RТ. Док: Ҳфырхацәа раамҭа" асасцәа, аиҿкааҩцәа, алахәылацәа, акиноҭыхҩцәа.
Гәык-ԥсыкала Аԥсны адгьыл аҿы, ҳаҳҭнықалақь Аҟәа аԥсшәа шәасҳәар сҭахуп.
Агәра ганы сыҟоуп, иахьа Аԥсны даара акрызҵазкуа, аҵакы змоу аусмҩаԥгатә шымҩаԥысуа. Ари жәларбжьаратәи формат дууп, адунеи атәылақәа жәпакы рҿы имҩаԥысхьеит.
Иахьа, ари афестиваль Аԥсны сасны иаҳҭоуп. Иахьа азал аҿы иҟоуп Аԥсны Аҳәынҭқарра Ахада заԥхьа дгыло Аԥсны анапхгара, аҿар, астудентцәа, аруаа рхаҭарнакцәа, жәаҳәарада ара иҟоуп, иахьатәи афырхацәа хадақәа — Аԥсны иалҵыз иҷыдоу арратә операциа аветеранцәеи алахәылацәеи, иара убасгьы ҳфырхацәа рышықәснҵара зырҿио ауаа: абаҩхатәра злоу ажурналистцәа, акорреспондентцәа Руслан Гусаров, Павел Кукушкин, Семион Пегов, ҟабардатәи ҳаҳәшьа Инна Танашева – урҭ зегьы рбаҩхатәреи, ргәымшәареи, рымчи рыла иахьатәи афырхаҵаратә епоха имӡуа ахроника аԥырҵоит.
Азал аҿы иҟоуп ҳџьынџьуаҩ фырхаҵа Ахра Аҩӡба напхгара зиҭо Арратә операциа ҷыда алахәылацәа – ҳветеранцәа.
Иахьа Урыстәыла еиҳа ииашоу адунеитә еиҿкаара ҿыц азы ақәԥара мҩаԥнагоит. Уи ақәԥараҿы амацара иҟаӡам.
Аԥсны хәыҷы, жәаҳәарак ҟамҵакәа ари ақәԥараҿы иавагылоуп, ажәала мацара акәымкәа, услагьы, иҩыза иашаны. Аԥснытәи ахатәгәаԥхарауаа АОҶ азонаҿы еибашьуеит, аволонтиорцәа аус руеит, агуманитартә миссиақәа мҩаԥысуеит. Акыр шықәса уаҟа аус руан Аԥснытәи аҳақьымцәеи абаҩхатәра злоу ажурналистцәеи.
Ааи, ииашоуп, Аԥсны ацәыӡқәа маҷымкәа иамоуп. Аԥсуа дгьыл аҵеицәа, арратә операциа ҷыда азонаҿы аиаша рхы ақәырҵоит, иҭахоит. Ҳара урҭ зегьы хаҭа-хаҭала иаҳдыруеит, иаҳгәалашәоит, ргәалашәара ҳаҭыр ақәаҳҵоит.
Ари афестиваль Аԥснытәи Аҳәынҭқарратә университет аҭӡамцқәа рыҩнуҵҟа амҩаԥгара даара ииашоу ӡбара бзианы исыԥхьаӡоит. Ари аудиториа, афильмқәа зегь раԥхьаӡа иргыланы иззыҟаҵоу ахәаԥшцәа роуп: астудентцәа, аҿар, Аԥсны аррамаҵурауаа. Жәаҳәарада, сара даара идуӡӡаны ҭабуп ҳәа ласҳәоит иахьа абра иҟоу апроект "RТ. Док: Ҳфырхацәа раамҭа" апродиусер хада Екатерина Иаковлева, ҳҿар, ҳтәылауаа, ҳџьынџьуаа абзиара, аиашара рган ахь аҟазаара шаҟа ихадоу, ахьыдлырбо азы.
Ҳџьынџьуаа ҿарацәа рахь схы нарханы исҳәоит – ҩымш рыҩныҵҟа арратә операциа ҷыда шымҩаԥысуа, уи иалахәу ауаа — ҳџьынџьуаа, аинтернационалтә бригада «Пиатнашка» аибашьцәагьы уахь иналаҵаны рыԥсҭазаарақәа ирызку афильмқәа рацәаны жәбоит.
Исҳәарц сҭахуп: арҭ афильмқәа аибашьра мацара акәӡам изызку. Арҭ афильмқәа шәрыхәаԥшыр ижәбоит урҭ, ақьиареи, арыцҳашьареи, ахамеигӡареи, аиҩызареи, абзиабареи ирызку фильмқәаны ишыҟоу. Шәрыхәаԥш, ижәба, ишәныр арҭ афильмқәа.
Иҭабуп ҳәа расҳәарц сҭахуп аиҿкааҩцәа зегьы, жәаҳәарада, Аԥснытәи аҳәынҭқарратә университет, уи анапхгаҩы, академик Алеко Алықьса-иԥа Гәарамиа, иара убас аиҿкааратә еилакы алахәылацәа зегьы.
Сара исҳәарц сҭахуп, иахьатәи аамҭазы, ҳара зегьы ҳаӡәыкны ҳанеицыҟоу, иаку адоуҳатә беиарақәа анҳамоу, ацәгьеи абзиеи, ахаҵареи рганахь ала иаҳзеиԥшу азнеишьақәа анҳамоу даара акыр шаҵанакуа. Уи, иаҵшьны иаанарԥшуеит Аԥсни Урыстәылеи ирыбжьоу акзаара, аиҩызаратәи аиашьаратәи еимадаратә доуҳа. Иҭабуп.