Аԥсны Адәныҟатәи аусқәа рминистрра Урыстәылатәи Афедерациа аҵакыраҿы Аԥсны Аҳәынҭқарра атәылауаҩ Иракли Бжьнаа иаанкылареи анаҩстәи ирбаандаҩреи ирыдҳәалоу аҭагылазаашьа хшыҩзышьҭрала иацклаԥшуеит, урыстәылатәи аган аҟынтә иҟоу аҭагылазаашьа аилкааразы иахәҭоу ауснагӡатәқәа мҩаԥнагоит.

Аԥсны Аҳәынҭқарра атәылауаҩ Бжьнаа, иара убас Урыстәылатәи Афедерациа атәылауаҩрагьы имоуп, иааиԥмырҟьаӡакәа дынхоит Ростов-на-Дону ақалақь аҿы, уаҟа аҳәынҭқарратә ҵараиурҭақәа руак аҿы арҵаҩратә усура мҩаԥигоит.

Аԥсны Адәныҟатәи аусқәа рминистр инапынҵала Ростов-на-Дону ақалақь аҿы иҟоу Аԥсны Аҳәынҭқарра аҳаҭыртә консул Урыстәылатәи Афедерациа акомпетенттә усбарҭақәа аамҭа-аамҭала иҽрыдиҳәалоит.

Аԥсны Аҳәынҭқарра атәылауаҩк иҳасаб ала Иракли Бжьнаа иҭаацәеи иареи ирыдгалан иахәҭоу аконсултәи азинтәи цхыраара.

Аԥсны АдәАР атәыла анҭыҵ азинтә ҭагылазаашьа уадаҩ иақәшәаз дарбанызаалак Аԥсны атәылауаҩ ганрацәала адгылара иҭара апринциптә позициа иқәныҟәоит.

Аусбарҭа аҭагылазаашьа аҿиара хшыҩзышьҭрала ацклаԥшра иацнаҵоит, аус зуа ҩ-ганктәи азинтә механизмқәа рҳәаа иҭагӡаны урыстәылатәи аган аҟынтәи ииашоу аинформациа аиуразы иахәҭоу ауснагӡатәқәа зегьы мҩаԥнагоит. Аус аҭагылазаашьақәа зегьы рышьақәыргылареи Аԥсны аҳәынҭқарра атәылауаҩ изакәантәу изинқәеи иинтересқәеи рыхьчареи хықәкыс иҟаҵаны, Урыстәылатәи Афедерациа акомпетенттә усбарҭақәа аус рыцура ҳшазхиоу ааҳарԥшуеит.