АҞӘА, нанҳәа 16. /ТАСС/. Урыстәылеи Америкатәи Аидгылеи рхадацәа Владимир Путини Дональд Трампи Алиаска реиԥылара иалҵшәаны атәылақәа реизыҟазаашьақәа еиӷьхап ҳәа агәыӷра ҳамоуп ҳәа игәаанагара ааирԥшит ТАСС акорреспондент диҿцәажәо ахадацәа реиԥылара ахҳәаа азҭаз Аԥсны адәныҟатәи аусқәа рминистр Олег Барцыц.

«Урыстәылатәи Афедерациа ахада Владимир Владимир-иԥа Путини Америка анапхгаҩы Дональд Трампи реиԥылара гәахәароуп ҳәарада. Жәаҳәарада еилкаауп, уи иахьатәи аҭагылазаашьаҿы имҩаԥгахарц азы акыр зҵазкуа аусура шымҩаԥгаз, аҩ-ҳәынҭқаррак рхаҭарнакцәа ргәазыҳәара шаҭахыз. Урыстәылеи аколлективтә Мраҭашәареи иахьатәи реизыҟазаашьақәа аҭоурых аҿы зегь реиҳа иуадаҩу ҭагылазаашьан ианыҟоу, Урыстәылеи Америкатәи Аидгыла рхадацәа ас еиԥш аиԥылара амҩаԥгаразы иаадырԥшыз агәымшәареи агәазыҳәареи ус дууп. Ҳара ҳазыԥшуп Урыстәылатәи Афедерациеи Америка Еидгылоу аштатқәеи рыбжьара аҩганктәи аизыҟазаашьақәа реиӷьхара», - иҳәеит Барцыц.

Аԥсны адәныҟатәи аусқәа Рминистрра аиҳабы иажәақәа рыла, аҩ-ҳәынҭқаррак рыбжьара ишьақәгылаз иҟәандоу аҭагылазаашьақәа атәылақәа жәпакы ирыцхраар алшоит. Убри аҟнытә, адунеизегьтәи аполитикатә еимабзиара аиӷьтәрази, Урыстәылеи Америкатәи Аштатқәеи рыбжьара аусеицуратә еизыҟазаашьақәа рырҭынчрази, адунеизегьтәи апроцесс дуқәа ралагара алыршахоит.

Аԥсны адәныҟатәи аусқәа рминистр Путини Трампи реиԥылара аҟынтәи Украина аиҭакра ӷәӷәақәа ирзыԥшызар ахәҭоуп ҳәа иԥхьаӡоит.

“Ҳәарада, ҳара агәыӷра ҳамоуп, сара сгәаналагьы, Украиназы даара акыр зҵазкуа аиҭакрақәа ҳарзыԥшызароуп ҳәа. Владимир Путини Дональд Трампи иҟарҵаз ахҳәаа бзиақәа инарымаданы, аиԥылара хра злоу акы акәны иҟалеит. Аҩ-ҳәынҭқаррак рхадацәа ркомандақәа аусура ду рзыԥшуп, ҳаргьы адунеи аҿы миллионҩыла ауаа реиԥш, аҩ-ҳәынҭқаррак рыбжьара аизыҟазаашьақәа реиӷьтәреи аԥхарра рыҵалареи рганахь ала аиҭакрақәа ҟалап ҳәа агәыӷра ҳамоуп”, - иҳәеит Барцыц.